Social Viral : 'आ' म्हणजे 'आत्मा' आणि 'ई' म्हणजे 'ईश्वर' या दोन शब्दांचा संगम म्हणजे 'आई'. हा दोन अक्षरी शब्द जणू वात्सल्य, प्रेमाचं प्रतिक. या जगात आई आणि मुलांचं नातं अगदी गर्भापासून सुरू होतं. निर्स्वार्थी प्रेमाची परिभाषा सांगणारं हे गोड नातं आहे. ज्याप्रमाणे आई आपल्या मुलांवर प्रेम करते त्याची तुलनाच करता येणार नाही. प्रसंगी ती संकटासमोर धीटपणे उभी राहून आपल्या लेकरांचं रक्षण करते. याचा प्रत्यय सोशल मीडियावर व्हायरल होणारा व्हिडिओ पाहून तुम्हालाही येईल.
भर पावसात आपल्या लेकरांसाठी मायेच छत्र उभं करणाऱ्या एका माऊलीचा व्हिडिओ सध्या तुफान व्हायरल होत आहे. मागील काही महिन्यांमध्ये राज्यासह देशातील काही भागांना अवकाळी पावसाने अक्षरश: झोडपून काढलं. त्याचाच फटका या बेघर कुटुंबाला बसला. अशा परिस्थितीत पोटच्या लेकींसाठी ही माय ढाल बनून पावसाचा सामना करताना दिसते आहे. मुसळधार पावसामध्ये ही आई ताडपत्री पकडून ठाम उभी आहे.
या व्हायरल व्हिडिओमध्ये धो-धो कोसळणाऱ्या पावसात ही आई आपल्या मुलींचं पावसापासून संरक्षण करत आहे. स्वत: पावसाच्या धारा अंगावर झेलत या आईने तिच्या लेकरांसाठी मायेच छत्र उभारलं आहे. हा व्हिडिओ पाहून कोणाच्याही डोळ्यात अश्रू तरळतील. तर व्हिडिओ पाहिलेले काही नेटकरी भावूक झाले आहेत. अलिकडेच देशात काही ठिकाणी पावसाच्या हलक्या सरी बरसल्या तर काही ठिकाणी भागांना चांगलच झोडपलं. त्या परिस्थितीत ही महिला जीवाचं रान करत तिच्या लेकींना भिजण्यापासून वाचवताना दिसतेय.
kusum motivation नावाच्या एका इन्स्टाग्राम यूजरने हा व्हिडिओ शेअर केला आहे. या व्हिडिओने सोशल मीडिया यूजर्सच्या भावनांच्या तारा छेडल्या आहेत. या व्हिडिओमुळे अनेकांना आपल्या जन्मदात्या आईची आठवण झाली असं कमेंटच्या माध्यमातून समजतंय.
"आईपेक्षा मोठा योद्धा या जगात नाही" अशी कमेंट करत या यूजरने व्हायरल व्हिडिओकडे अनेकाचं लक्ष वेधलं आहे. त्यानंतर आणखी एका नेटकऱ्याने प्रतिक्रिया दिली आहे , "या मातेला शतश: प्रणाम" अशी कमेंट त्याने केली आहे.