जगात टवाळखोरांची काही कमी नाही. रात्रीच्या अंधारात टवाळखोर तरुणी किंवा महिलांशी करत असलेल्या गैरवर्तनाची अनेक प्रकरणं उघडकीस येतात. अशा घटनांचे व्हिडिओही सोशल मीडियात व्हायरल होत असतात. काही वेळा दिवसाढवळ्या तरुणींची छेड काढण्याचीही प्रकरणं समोर आली आहेत. हजरजबाबी आणि निडर तरुणी अशा टवाळखोरांना मोठ्या हिमतीनं जशास तसं उत्तर देण्याच्याही घटना आपण पाहिल्या असतील. सार्वजनिक ठिकाणी टवाळखोरी करणाऱ्यांना लोकांची चोप दिल्याचंही आपण पाहिलं आहे. पोलिसांकडूनही अशांवर वेळोवेळी कारवाई केली जाते. तरीही टवाळखोरांचे उपद्याप काही कमी होताना दिसत नाहीत.
सध्या सोशल मीडियावर असाच एक व्हिडिओ व्हायरल होत आहे. एका लिफ्टमध्ये तरुण एका मुलीची छेड काढण्याचा प्रयत्न करत होता. पण मुलीनं त्याला असा धडा शिकवला की तो आयुष्यात कधी विसरू शकणार नाही.
व्हिडिओत काय दिसतं?एक तरुण लिफ्टमधून बाहेर जाताना दिसतो. पण त्याच फ्लोअरवर एक तरुणी लिफ्टमध्ये जात असल्याचं पाहून तो पुन्हा लिफ्टमध्ये येतो. यानंतर तो तरुणीशी जवळीक साधण्याचा प्रयत्न करतो. सुरुवातीला तरुणी दुर्लक्ष करते. पण तरुणाकडून पुन्हा गैरवर्तन होत असल्याचं पाहून ती आक्रमक होते आणि टवाळखोर तरुणाच्या जोरदार कानशिलात लगावते. तरुणीच्या एका थपडेत तरुण बिथरता. त्यानंतर तरुणी पुन्हा त्याला लाथ मारते आणि टवाळखोर जागीच कोसळतो.
हा व्हिडिओ सोशल मीडिया प्लॅटफॉर्म ट्विटरवर @LockerRoomLOL नावाच्या आयडीसह शेअर करण्यात आला आहे. अवघ्या ५५ सेकंदांचा हा व्हिडिओ आतापर्यंत १ लाख ७७ हजारांहून अधिक वेळा पाहिला गेला आहे, तर ६ हजारांहून अधिक लोकांनी व्हिडिओला लाईक करून वेगवेगळ्या प्रतिक्रिया दिल्या आहेत.