व्हॅलेंटाइन डेच्या दिवशी एक जोडपे एका पबमध्ये रोमँटिक डेटवर गेले होते. या जोडप्याने जेवण केले आणि वाईन प्यायली, ज्याचे बिल जवळपास 18 हजार रुपये झाले. मात्र, या जोडप्याने पबमध्ये मध्ये पैसे दिले नाही आणि तेथून पळ काढला. यानंतर पबच्या मालकाने फेसबुकची मदत घेत जोडप्याचे बिल सार्वजनिक केले. यासोबतच हे बिलही विहित मुदतीत देण्याचे आदेश दिले होते.
ही माहिती पोलिसांनाही देण्यात आली. दरम्यान, सोशल मीडिया युजर्संनी पब मालकाकडे या जोडप्याचे सीसीटीव्ही फुटेज जारी करण्याची मागणी केली. डेली मेलच्या वृत्तानुसार, ही घटना यूकेच्या नॉर्थ यॉर्कशायरमधील आहे. या ठिकाणी असलेल्या 'द मिल' नावाच्या पबने या जोडप्याचे बिल सार्वजनिक केले. हे बिल दोन भागात होते. या जोडप्याने थाई ग्रीन करी, 4 वाईनच्या बाटल्या आणि इतर वस्तू घेतल्या होत्या. मात्र, या बिलावर नाव नव्हते.
दरम्यान, हे बिल 16 फेब्रुवारीला एका महिलेने येऊन भरल्याचे पबच्यावतीने नंतर सांगण्यात आले. ती त्या तरुणाची मैत्रीण असल्याचे म्हटले जात आहे. दुसरीकडे, पबच्या कर्मचाऱ्यांनीही संबंधित व्यक्तीशी संपर्क साधल्याचे सांगितले. मात्र त्या व्यक्तीने उत्तर दिले की, आपल्याकडे अद्याप पैसे नाहीत आणि पगार मिळताच बिल भरेन. दरम्यान, या संपूर्ण प्रकरणाची सुरुवात व्हॅलेंटाईन डेपासून झाली. जेव्हा एका जोडप्याने रोमँटिक डेटसाठी टेबल बुक केले होते. मात्र या जोडप्याने बिल दिले नाही.
यादरम्यान 'द मिल'च्या फेसबुक पेजवरून ही चूक तुमच्याकडून जाणूनबुजून झाली नसल्याचा आम्हाला विश्वास असल्याचे सांगण्यात आले. तसेच, दुपारी 4 वाजेपर्यंत येऊन बिल भरा, असे सांगण्यात आले. यानंतर 'द मिल'ने आणखी एक पोस्ट शेअर करत म्हटले की, लोक आणि पोलीस विचारत आहेत की बिल भरले आहे का? पण आम्ही वाट पाहत आहोत. दरम्यान, 16 फेब्रुवारी रोजी एका अज्ञात महिलेने बिल भरले.