Social Viral : भारताचा आक्रमक फलंदाज विराट कोहली हे नाव जगभरात प्रसिद्ध आहे. आपल्या दमदार खेळीने विराटने किक्रेटप्रेमींना आपलंस केलंय. आंतरराष्ट्रीय क्रिकेट सामन्यात विक्रमांचा पाऊस पाडणार हा क्रिकेटर नेहमीच चर्चेत असतो. सध्या विराट कोहली इंडियन प्रीमिअर लीगमध्ये रॉयल चॅलेंजर्स बंगळुरू या संघाचं प्रतिनिधित्व करताना दिसतोय.
दरम्यान, आयपीएल सामन्यांखेरीज विराट एका वेगळ्याच कारणाने चर्चेचा विषय ठरलाय. सोशल मीडियावर त्याच्या एका फॅनने आपल्या अनोख्या कलाकारीने विराटविषयी प्रेम व्यक्त केलंय. इंस्टाग्रामवर शेअर करण्यात आलेला हा व्हिडिओ विराटच्या चाहत्यांना प्रचंड आवडला आहे.
सोशल मीडिया हे कलागुणांना वाव देण्याचं एक लोकप्रिय असं माध्यम बनलं आहे. मनोरंजनसह अनेकांच्या कल्पकतेला न्याय देण्याचं काम या माध्यमातून केलं जातं. आयपीएलच्या या चालू हंगामात किंग कोहलीच्या चाहत्याचा व्हिडिओ सोशल मीडियावर तुफान व्हायरल होत आहे. सूर्यकिरणांच्या साहाय्याने या चाहत्याने क्रिकेटर विराट कोहलीचं सनलाईट आर्ट बनवलं आहे. गोल भिंगाचा वापर करत त्याने आपली क्रिएटिव्हिटी व्हिडिओच्या माध्यमातून दाखवली आहे. धगधगत्या उन्हात उभा राहून त्याने कोहलीचं हुबेहुब चित्र रेखाटलं आहे.
या व्हायरल व्हिडिओवर आतापर्यंत १ लाखांपेक्षा अधिक नेटकऱ्यांनी लाईक्सचा वर्षाव केला आहे. 'karthik_sunlight_artist' नावाच्या अकाउंटवरून हा व्हिडिओ शेअर करण्यात आला आहे. इंटरनेटवर व्हायरल झालेल्या या व्हिडिओवर नेटकऱ्यांनी मोठ्या प्रमाणात कमेंट्सदेखील केल्याचं पाहायला मिळत आहे.