लहान मुलांना खेळायला प्रचंड आवडतं. पण अनेकदा खेळता खेळता ते काही अशा गोष्टी करतात ज्यामुळे मुलांचा जीव धोक्यात येतो आणि पालकही अडचणीत येतात. अशीच एक घटना आता घडली आहे. धक्कादासमोर व्हिडीओ समोर आला आहे. ज्यामध्ये एक लहान मुलगा वॉशिंग मशीनच्या ड्रायरमध्ये अडकला आहे. मुलाची आई काही कामात व्यस्त होती. याच दरम्यान मुलगा खेळत असताना ही घटना घडली.
महिलेला अचानक मुलाच्या किंचाळण्याचा आवाज ऐकू आल्याने ती धावली आणि मुलाला मशीनमध्ये अडकलेले पाहून त्याला बाहेर काढण्यासाठी प्रयत्न करू लागली. अनेक प्रयत्नांनंतरही, जेव्हा महिलेला अपयश आले तेव्हा तिने वेळ न गमावता आपत्कालीन सेवांना कॉल केला. अग्निशमन दलाचे जवान घाईघाईने तेथे पोहोचले आणि तासाभराच्या प्रयत्नानंतर त्यांनी मुलाची सुटका केली. डेली मिररने त्याचा व्हिडीओ इन्स्टाग्रामवर शेअर केला आहे.
व्हायरल झालेल्या व्हिडिओमध्ये दिसत आहे की अग्निशमन दलाच्या जवानांनी मशीन पूर्णपणे उघडून ड्रायरला बाहेर काढलं आहे, ज्यामध्ये मुलगा अशा प्रकारे अडकला आहे की बाहेर फक्त त्याचे हात आणि पाय दिसत आहेत. हे दृश्य भीतीदायक आहे. त्यानंतर, त्यांनी मशीनमधून ड्रायर कापला आणि मुलाला बाहेर काढले. मदत करण्यास आणखी थोडा विलंब झाला असता तर मुलाला वाचवणं अशक्य झालं असतं.
सोशल मीडियावर हा व्हिड़ीओ जोरदार व्हायरल होत असून याची सर्वत्र चर्चा रंगली आहे. काही दिवसांपूर्वी एका बंद कारमधून एका मुलाला वाचवण्याचा व्हिडीओ व्हायरल झाला होता. अमेरिकेत ही घटना घडली होती. एका व्यक्तीने कारमधून मुलाला बाहेर काढण्यासाठी कारची काच फोडली होती. एका हिंदी वेबसाईटने याबाबतचे वृत्त दिले आहे.