क्रिकेट सामन्यांमधील भांडणे ही नित्याची बाब बनली आहे. आंतरराष्ट्रीय क्रिकेटमध्ये अशी अनेक उदाहरणं देता येतील की खेळाडू एकमेकांच्या अंगावर धावून गेले आहेत. असाच एक प्रकार सध्या सोशल मीडियावर व्हायरल झाला आहे. पण, ही कोणती आंतरराष्ट्रीय मॅच नव्हती, तर सेलेब्रिटी क्रिकेट लीगमधील मॅच होती आणि त्यात तुंबळ हाणामारी पाहायला मिळाली. बांगलादेशमधील सेलिब्रिटी क्रिकेट लीगच्या सामन्यादरम्यान ही मारामारी झाली आणि ६ जणांना त्यांच्या दुखापतीमुळे रुग्णालयात दाखल करावे लागले.
पंचाच्या चुकीच्या निर्णयामुळे चित्रपट निर्माते मुस्तफा कमाल राज आणि दीपंकर दीपोन यांच्या टीममध्ये भांडण झाले. शाब्दिक बाचाबाचीचे रूपांतर मारामारीत झाले. काही खेळाडूंनी एकमेकांवर हात उचलण्यास सुरुवात केली आणि काही वेळातच बॅटने हल्ला सुरू केला. शिशिर सरदार, राज रिपा, जॉय चौधरी, अतिक रहमान, शेख शुभो आणि आशिक जाहिद अशी जखमींची नावे आहेत.