Video - महिन्याला दीड लाख कमाई, तरी हवी सरकारी नोकरी; कारण ऐकून तुम्हालाही बसेल धक्का

सोशल मीडियावर सध्या एका तरुणाचा व्हिडीओ वेगाने व्हायरल होत आहे, ज्यामध्ये तो समाजातील अशा एका कटू सत्यावर भाष्य करत आहे. हा तरुण म्हणतो की, तो दरमहा तब्बल दीड लाख रुपये कमावतो, तरीही तो सरकारी नोकरीसाठी धडपड करत आहे. यामागचं कारण सांगताना त्याने समाजाचा जो चेहरा समोर आणला आहे, तो खरोखरच विचार करायला भाग पाडणारा आहे. 

सोशल मीडिया प्लॅटफॉर्म 'एक्स' वर एक व्हिडीओ व्हायरल होत आहे. या व्हिडिओमध्ये खांद्यावर बॅग लटकवलेला एक तरुण सरकारी नोकरीच्या तयारीबद्दल बोलताना दिसत आहे. तो म्हणतो, "मी अगदी मनापासून सांगतोय, मी फक्त लग्नासाठी ही मेहनत करत आहे. मी दूध विकून महिन्याला १.५ लाख रुपये कमावतो, पण जर मी होमगार्ड म्हणून भरती झालो आणि मला तिथे महिन्याला फक्त २० हजार रुपये जरी मिळाले, तरी त्याची किंमत या दीड लाखापेक्षा जास्त असेल." तो पुन्हा एकदा आवर्जून सांगतो की, ही सर्व धडपड फक्त लग्नासाठी सुरू आहे.

"फक्त लग्नासाठी सरकारी नोकरी हवी आहे, अन्यथा मी दीड लाख तर कमावतच आहे" हे त्याचं वाक्य समाजातील त्या मानसिकतेवर प्रहार करते जे फक्त सरकारी नोकरीलाच खऱ्या अर्थाने 'रोजगार' समजतात. आपल्या समाजात आजही असा समज आहे की, मुलाकडे सरकारी नोकरी असेल तर सर्व काही आलबेल आहे, मग त्याचं वर्तन किंवा स्वभाव कसाही असो. समाज आजही सरकारी नोकरीलाच सुरक्षित भविष्याची गुरुकिल्ली मानतो, जे पूर्णपणे चुकीचं आहे. समाजाला आरसा दाखवणारा हा व्हिडीओ सध्या सोशल मीडियावर मोठ्या प्रमाणात शेअर केला जात आहे.

हा व्हिडिओ 'एक्स'वर @YadavManish1001 नावाच्या व्हेरिफाईड हँडलवरून पोस्ट करण्यात आला असून याला ५७ हजारांहून अधिक व्ह्यूज मिळाले आहेत. इतकंच नाही तर नेटकरी यावर मोठ्या प्रमाणात प्रतिक्रिया देत आहेत. एका युजरने कमेंटमध्ये लिहिलं आहे की, "खरंच, नोकरीपेक्षा जास्त पैसे दूध विकून घरी बसून मिळतात." तर दुसऱ्या एकाने लिहिले, "पैसे असतील तर लग्नासाठी सगळे तयार होतात."