'पुष्पा' या दाक्षिणात्य सुपरहिट चित्रपटानं संपूर्ण देशभरात नुसता धुमाकूळ घातला आहे. सिनेमा बॉक्स ऑफिसवर तर हिट ठरला आहेच. पण चित्रपटातील गाण्यांनी देखील यंगीस्तानला 'याड' लावलं आहे. गाण्यांमधील हटके स्टेप्स तरुणाईचं लक्ष वेधून घेताना दिसत आहेत. त्यातच श्रीवल्ली गाण्याचे आजवर अनेक भाषांमधील व्हर्जन्स सोशल मीडियात व्हायरल होऊ लागली आहेत.
नुकतंच श्रीवल्ली गाण्याचं मराठी व्हर्जन देखील आलं होतं आणि ते सोशल मीडियात जोरदार हिट ठरत असतानाच आता या गाण्याचं भोजपुरी व्हर्जन देखील आलं आहे. भोजपुरीतही याची जोरदार चर्चा सुरू झाली आहे. श्रीवल्ली गाणं मूळचं सिड श्रीराम यांनी गायलं आहे. तर याचं हिंदी व्हर्जन लोकप्रिय बॉलीवूड गायक जावेद अली यांनी गायलं आहे. आता या गाण्याचं भोजपुरी व्हर्जन बाजारात आलं आहे.
श्रीवल्ली गाण्याचं भोजपुरी व्हर्जनचा व्हिडिओ आयएएस अधिकारी अवनीश शरण यांनी त्यांच्या ट्विटर हँडवलर शेअर केला आहे. 'भोजपुरीमध्ये इतकं मधुर गीत...वाह', असं कॅप्शन या व्हिडिओला अवनीश शरण यांनी दिलं आहे.
दोन मिनिटं २० सेकंदाच्या या व्हिडिओला आतापर्यंत ६८ हजाराहून अधिक वेळा पाहण्यात आलं असून ५ हजाराहून अधिक जणांनी लाइक केलं आहे. गाणं पाहून अनेकांनी वेगवेगळ्या प्रतिक्रिया दिल्या आहेत. 'मी पहिल्यांदाच एखादं भोजपुरी गाणं अगदी शेवटपर्यंत पाहिलं आहे', असं एका युझरनं म्हटलं आहे. तर आणखी एकानं भोजपुरी भाषेत जो गोडवा आहे, आपलेपणा आणि प्रेम आहे. ते इतर कोणत्याही भाषेत नाही, असं म्हटलं आहे. सुंदर आवाज आणि अचूक शब्दांची निवड करुन छान जमलं आहे, असंही एकानं म्हटलं आहे.