सावंतवाडी : गोवा बनावटीच्या चोरट्या दारूची वाहतूक करताना सावंतवाडी पोलिसांनी चौघांना ताब्यात घेतले असून त्यांच्याकडील चारचाकी गाडीसह दारू मिळून सुमारे ६ लाख ९३ हजार रुपयांचा मुद्देमाल जप्त केला. ही कारवाई सावंतवाडी- आंबोली मार्गावर बावळाट येथे करण्यात आली.अमर अंकुश रास्ते व नितीन देविदास पाटील (दोन्ही रा. पुणे) आणि सीताराम रामू जंगले व बाबुराव भैरू पाटील (दोन्ही रा. आंबेगाव सावंतवाडी) अशी ताब्यात घेतलेल्या चौघांची नावे आहेत. ते आपल्या ताब्यातील चारचाकी गाडीतून गोवा बनावटीची दारू घेऊन आंबोलीमार्गे पुणे अशी चोरटी वाहतूक करत होते.दरम्यान, सावंतवाडी-आंबोली मार्गावर नाकाबंदी करून वाहनांची तपासणी करत असताना बावळट तिठा येथे त्यांच्या कारची तपासणी केली. यावेळी कारमध्ये गोवा बनावटीची दारू आढळली.
याप्रकरणी चौघांवर कारवाई करण्यात आली असून त्यांच्याकडील १ लाख ९३ हजार रुपयांची दारू तसेच कार मिळून एकूण सहा लाख ९३ हजार रुपयांचा मुद्देमाल जप्त करण्यात आला.
ही कारवाई आंबोली पोलीस दूरक्षेत्राचे पोलीस हवालदार विश्वास सावंत व सावंतवाडी वाहतूक पोलीस सखाराम भोई यांनी केली. याची नोंद येथील पोलीस ठाण्यात करण्यात आली आहे.