कणकवली : मुंबई-गोवा महामार्गावर जानवली येथे अज्ञात कारने मागून दिलेल्या धडकेत एका दुचाकीस्वाराचा जागीच मृत्यू झाला. गजानन केशव शेट्ये (सध्या रा. जानवली वाकाडवाडी, मूळ रा.तोंडवली, कणकवली ) असे मृताचे नाव आहे. हा अपघात रविवारी (दि.२८) रात्री ११ वाजण्याच्या सुमारास जानवली टिव्हीएस शोरूम नजीक घडला. या अपघातानंतर कार चालक पसार झाला.
गजानन शेट्ये हे आपल्या ॲक्टिव्हा (क्रमांक एम एच ०७-वाय-८४८८) वरुन कणकवलीच्या दिशेने येत होते. त्याचवेळी कणकवलीच्या दिशेने जाणाऱ्या अज्ञात कारचलाकाने मागून शेट्ये यांच्या दुचाकीला धडक दिली. तसेच चालक कारसह पसार झाला. अपघाताचा मोठा आवाज ऐकून रस्त्यावर फेरफटका मारणारे दामोदर सावंत यांनी अपघातस्थळी धाव घेतली. त्यांच्यासोबत जानवली सरपंच शुभदा रावराणे, पोलिस पाटील मोहन सावंत, तुकाराम तावडे, आशिष राणे आदी ग्रामस्थानी घटनास्थळी धाव घेतली.
यानंतर जखमी शेट्ये यांना कणकवली उपजिल्हा रुग्णालयात उपचारासाठी हलवले. मात्र, रुग्णालयात नेण्यापूर्वीच त्यांचा मृत्यू झाल्याचे डॉक्टरांनी सांगितले. दरम्यान अपघातानंतर कार चालकाने घटनास्थळावरून पलायन केले. मात्र, या अपघाताची घटना तेथील सीसीटीव्हीमध्ये रेकॉर्ड झाल्याची शक्यता आहे.