मच्छिमारांचे उपोषण

आक्रमक : पर्ससीनवर कारवाईची मागणी

आचरा : गेली सहा वर्षे आचरा बंदरातील अनधिकृत पर्ससीनवर कारवाई करण्याची मागणी करून हतबल झालेल्या पारंपरिक मच्छिमारांनी भर समुद्रात शुक्रवारी सकाळपासून उपोषण सुरु केले व पारंपरिक महिला मच्छिमारांनी आचरा जेटीवर धरणे आंदोलन छेडले. यावेळी मालवण, तळाशिल, आडबंदर, मुणगे या भागातील पारंपरिक मच्छिमार मोठ्या संख्येने उपस्थित होते. सुरुवातीला पारंपरिक मच्छिमारांनी आपल्या होड्या खोल समुद्रात नांगरून उपोषणास सुरुवात केली होती. दरम्यान, सायंकाळी मालवणच्या तहसीलदार वनिता पाटील यांनी उपोषणस्थळी भेट देत पर्ससीननेट धारकांवर कारवाई करण्याचे आश्वासन दिले. यामुळे हे उपोषण आठ दिवसांसाठी स्थगित करण्यात आले. समुद्र खवळलेल्या स्थितीत असल्याने आचरा ठाण्याचे पोलीस निरीक्षक महेंद्र शिंदे व आचरा सरपंच मंगेश टेमकर यांनी मच्छिमारांशी संपर्क करून आचरा खाडीत आपल्या होड्या हलवाव्यात अशी विनंती केल्याने पारंपरिक मच्छिमारांनी होड्या खाडीत आणून उपोषण चालू ठेवले. यावेळी मच्छिमार नेते छोटू सावजी, रविकिरण तोरसकर, धर्माजी आडकर, बाबी जोगी, दिलीप घारे, संजय केळुसकर, नारायण कुबल, विष्णू कुबल, वासुदेव कमळे, गौरी सारंग, सिमाली चोपडेकर, वसुंधरा कमळे आदी २०० हून जास्त महिलाही सहभागी होत्या. अस्तित्वासाठी निर्वाणीचा लढा पर्ससीन मासेमारीमुळे पारंपरिक मच्छिमार मासेमारीसाठी गेले असता समुद्रातून रिकाम्या हाताने माघारी फिरण्याची वेळ आली आहे. पारंपरिक मच्छिमार जिवंत ठेवण्यासाठी त्याचे अस्तित्व शिल्लक राहण्यासाठी हा निर्वाणीचा लढा आहे. जोपर्यंत पर्ससीनवर कारवाई होणार नाही तोपर्यंत मागे हटणार नाही असा पारंपरिक मच्छिमारांनी उपोषणावेळी निर्धार केला. आचरा बंदरातील प्रत्येक पारंपरिक मच्छिमार आपली होडी घेऊन उपोषणास बसले होते. मात्र, सायंकाळी उपोषण मागे घेण्यात आले. (वार्ताहर)