दोडामार्ग : दोडामार्गात भरवस्तीत हत्तीचा धुमाकूळ सुरूच असूनटस्कराने हेवाळे-खराडीब्रिज येथे वामनराव विठ्ठल देसाई व उल्हास माणिकराव देसाई यांच्या घरात घुसण्याचा प्रयत्न केला.
दोडामार्ग तालुक्यात टस्कर हत्तीचा धुमाकूळ सुरूच असून काल रात्री ११ वाजण्याच्या सुमारास टस्कराने हेवाळे-खराडीब्रिज येथे वामनराव विठ्ठल देसाई व उल्हास माणिकराव देसाई यांच्या घरात घुसण्याचा प्रयत्न केला. देसाई कुटुंबीयांनी आरडाओरडा केल्याने टस्कराने जंगलात धुम ठोकली. जंगलात परतताना त्याने लगतच्या शेतीची नासधूस केली.
तिलारी खोऱ्यात गेल्या दोन वर्षांपासून हत्ती धुमाकूळ घालीत आहेत. शेतकऱ्यांच्या शेती बागायती पायदळी तुडवत लाखो रूपयांचे नुकसान हत्तींकडून सुरू आहे. त्यामुळे बळीराजा संकटात सापडला आहे. काही ठिकाणी तर शेतकऱ्यानी शेती करणेच सोडून दिले आहे.
तालुक्यात गेल्या महिन्यांपासून हा कळप स्थिरावला आहे. याठिकाणी सुशिक्षित बेकार युवकांनी रोजगाराचे साधन म्हणून केळी बागायती फुलविल्या आहेत. मात्र, याच बागायतींमध्ये हत्ती सध्या धुडगूस घालून सातत्याने नुकसान करीत आहेत.