खटाव : पुसेगाव पोलीस ठाण्याचे पोलीस निरीक्षक विश्वजित घोडके यांची पुणे येथे पदोन्नती झाल्यामुळे त्यांचा खटाव ग्रामपंचायत व सावित्रीबाई फुले महिला पतसंस्था यांच्यावतीने सत्कार करण्यात आला.
ग्रामपंचायतीच्या सभागृहात झालेल्या कार्यक्रमास सरपंच नंदकुमार वायदंडे, जनसेवा प्रतिष्ठानचे अध्यक्ष राहुल पाटील, उपसरपंच अमर देशमुख, ग्रामपंचायत सदस्य यांच्याहस्ते, तर सावित्रीबाई फुले पतसंस्थेचे चेअरमन नम्रता भोसले, व्यवस्थापक शबाना काझी यांनी सत्कार केला.
घोडके म्हणाले, ‘खटाव-माण तालुक्यांतून प्रशासकीय सेवेत उच्च पदस्थ अधिकारी आले आहेत. राजकीय, सामाजिक, शैक्षणिक वारसा असणाऱ्या खटाव तालुक्यातील विशेषतः पुसेगावसारख्या पुण्यनगरीत काम करण्याची संधी मिळाली आहे. खटावसारख्या राजकीय संवेदनशील असणाऱ्या गावात काम करताना अनेक अडचणींना सामोरे जावे लागेल. प्रशासकीय अधिकारी म्हणून काम करताना एक स्वतंत्र विचार व वेगळी पॉलिसी राबवत असताना गावातील दोन संघटनांना विश्वासात घेऊन त्यांच्यात समन्वय साधून प्रत्येक गोष्ट करत गेलो. यामुळे पुसेगाव पोलीस ठाण्यांतर्गत येणाऱ्या सर्व गावांमध्ये खटाव गावचे उदाहरण देऊन प्रत्येक प्रसंगातून मार्ग काढून तीन वर्षांचा कालावधी पूर्ण केलाच. त्याचबरोबर पुसेगाव पोलीस स्टेशनचे नाव राज्यात नेता आले.
यावेळी ग्रामपंचायत सदस्य उत्तम बोर्गे, निवास पवार, राहुल जमदाडे, दीपक घाडगे, महेश घाडगे, वैभव वाघ, रमेश शिंदे, बबन शिंदे, मुसा काझी उपस्थित होते.
२६खटाव-पुसेगाव-पोलीस
खटाव ग्रामपंचायतीच्यावतीने सहायक पोलीस निरीक्षक विश्वजित घोडके यांचा सत्कार सरपंच नंदकुमार वायदंडे यांच्या हस्ते करण्यात आला. यावेळी राहुल पाटील, उपसरपंच अमर देशमुख उपस्थित होते. (छाया : नम्रता भोसले)