महाबळेश्वर : महाशिवरात्रीला दरवर्षी क्षेत्र महाबळेश्वर येथे यात्रा भरते; परंतु मागील वर्षीप्रमाणे यंदाही कोरोनाचा संसर्ग वाढण्याचा धोका आहे. श्री क्षेत्र महाबळेश्वर देवस्थान ट्रस्टतर्फे १० ते १२ मार्च या कालावधीत श्री महाबळेश्वर हे मंदिर भाविकांसाठी बंद करण्याचा निर्णय घेतला आहे, अशी माहिती तहसीलदार सुषमा चौधरी-पाटील यांनी दिली.
महाशिवरात्रीला दरवर्षी क्षेत्र महाबळेश्वर येथे वार्षिक यात्रा भरते. या दिवशी श्री क्षेत्र महाबळेश्वर देवस्थान ट्रस्टच्यावतीने तसेच ग्रामस्थ व ग्रामपंचायतीच्या वतीने विविध धार्मिक व सांस्कृतिक कार्यक्रमांचे आयोजन केले जाते. श्री महाबळेश्वरच्या दर्शनासाठी महाराष्ट्र, कर्नाटक व आंध्र प्रदेशातून मोठ्या संख्येने भाविक दर्शनासाठी येतात. कोरोनामुळे गेल्या वर्षी ही यात्रा रद्द केली होती; परंतु यंदाही कोरोनाचा धोका टळला नाही. कोरोनाचे रुग्ण दिवसेंदिवस वाढतच आहेत. कोरोना प्रतिबंधात्मक उपाय योजना अंतर्गत जिल्हाधिकाऱ्यांनी नियमावली जाहीर केली आहे. या नियमावलीनुसार श्री क्षेत्र महाबळेश्वर देवस्थान ट्रस्टने बैठक घेऊन यंदाही महाशिवरात्रीला मंदिर भाविकांसाठी बंद ठेवण्याचा निर्णय घेतला आहे.
क्षेत्र महाबळेश्वर येथे पाच नद्यांचे उगमस्थान आहे. या स्थानावर पंचगंगा मंदिर बांधण्यात आले आहे. या मंदिरात पाच नद्यांचे पाणी नंदीच्या मुखातून एका दगडी कुंडात पडते. श्री महाबळेश्वराच्या दर्शनाला जाण्यापूर्वी या कुंडात स्नान करून भाविक श्री महाबळेश्वरच्या दर्शनासाठी जातात. त्यामुळे या मंदिरातही भाविकांची गर्दी होते. याशिवाय महाबळ व अतिबळ यांचीही मंदिरे आहेत. श्री कृष्णामाईचेही पौराणिक मंदिर येथे आहे. अशी सर्व मंदिरे भाविकांसाठी बंद राहणार आहेत.
चौकट :
भाविकांसाठी ऑनलाईन दर्शन
महाशिवरात्र ही गुरुवार, दि. ११ रोजी आहे; परंतु बुधवारपासूनच पुढील तीन दिवस हे मंदिर बंद ठेवण्यात येणार आहे, अशी माहीती तहसीलदार सुषमा चौधरी-पाटील यांनी दिली. या काळात सर्व नित्यनियमाने होणारे धार्मिक विधी पार पडतील. महाशिवरात्रीला या मंदिरात विश्वस्तांच्या उपस्थितीत सर्व धार्मिक विधी पार पडणार आहेत. सकाळी व सायंकाळी श्री महाबळेश्वराच्या होणाऱ्या आरतीला भाविकांना ऑनलाईन उपस्थित राहता येणार आहे. भाविकांनी याचा लाभ घ्यावा, असे आवाहनही चौधरी-पाटील यांनी केले आहे.