सातारा - येथील एका खासगी हॉस्पिटलमधील कर्मचारी विजय रामचंद्र साळुंखे (वय २४, रा. बालाजी अपार्टमेंट, समर्थ मंदिर, सातारा) याने हॉस्पिटलमध्येच गळफास घेऊन आत्महत्या केल्याची घटना रविवारी पहाटे उघडकीस आली.याबाबत पोलिसांनी दिलेली माहिती अशी, विजय साळुंखे हा साता-यातील एका नामांकित हॉस्पीटलमध्ये काम करत होता. शनिवारी रात्रपाळीसाठी त्याची ड्यूटी होती. त्यामुळे तो कामावर गेला होता. रात्री साडेबाराच्या सुमारास हॉस्पीटलमधील एका खोलीत त्याने गळफास घेतला. हा प्रकार पहाटेच्या सुमारास उघडकीस आल्यानंतर रुग्णालयात प्रचंड खळबळ उडाली. या प्रकाराची माहिती शाहूपुरी पोलिसांना देण्यात आली. त्यानंतर पोलिसांनी घटनास्थळी धाव घेऊन त्याचा मृतदेह शवविच्छेदनासाठी जिल्हा शासकीय रुग्णालयात पाठविला. विजयने नेमक्या कोणत्या कारणातून आत्महत्या केली, हे अद्याप पुढे आले नसून, पोलीस त्याच्या घरातल्यांकडे चौकशी करत आहेत.
साताऱ्यात खासगी हॉस्पिटलमध्ये कर्मचाऱ्याची आत्महत्या
By ऑनलाइन लोकमत | Updated: August 16, 2020 23:06 IST