कुडाळ : जावळी तालुक्यातील शेतकरी गेल्या अनेक वर्षांपासून शेतीपंपासाठी नियमित वीज पुरवठा व्हावा, यासाठी झगडत होते. याबाबत महिन्यापूर्वी शेतकरी संघटनेचे कुडाळ या ठिकाणी आंदोलन झाले होते. यामुळेच वीज वितरण कंपनीने शेतीपंपासाठी वीज पुरवठा सुरळीत केला असून, आपल्या प्रयत्नांना यश मिळाले आहे, अशी माहिती पश्चिम महाराष्ट्र शेतकरी संघटनेचे पश्चिम विभाग प्रमुख कमलाकर भोसले यांनी दिली.
याबाबत अधिक माहिती अशी की, जावळी तालुक्यांमध्ये गेल्या अनेक महिन्यांपासून शेती पंपांना अनियमित विजेचा पुरवठा होत होता. त्यामुळे भागातील शेतकरी पुरता वैतागून गेला होता. शेतीपंपाला दिल्या जाणाऱ्या वीज पुरवठ्याच्या वेळेमध्येही दोन तासांची विजेची कपात कपात होत होती. याबाबत अनेकदा शेतकऱ्यांनी तक्रारी करूनही वीज वितरण मंडळाकडून दुर्लक्ष केले जात होते. याबाबत शेतकरी संघटनेने कुडाळ या ठिकाणी आंदोलनही छेडले होते. शेतकऱ्यांच्या या आंदोलनाची तत्काळ दखल घेऊन वीज मंडळाचे उपकार्यकरी अभियंता सचिन बनकर यांनी पाठपुरावा केला आणि शेतीपंपासाठी वीज पुरवठा सुरळीत करण्यात यश मिळविले आहे.
याबद्दल शेतकरी संघटनेच्यावतीने वीज मंडळाचे अधिकारी व कर्मचारी यांचे कौतुक करण्यात आले आहे. तसेच नवीन कृषी धोरणात देण्यात आलेल्या वीज बिल सावलीचा फायदा घेण्यासाठी शेतकऱ्यांनी वीजबिल भरणा करावा आणि महावितरणला सहकार्य करावे, अशी विनंती केली आहे.
(कोट)
जावळी तालुक्यातील शेतकऱ्यांना यापुढे वीज पंपासाठी होणारे लोडशेडिंग होणार नसून, सुरळीत वीज पुरवठा होईल. एजीचा येणारा लोड हा १० एमच्या ट्रान्सफार्मवर घेतलेला आहे. यामुळे शेतीपंपासाठीचा वीज पुरवठा खंडित होणार नाही. वीज मंडळाचे सर्व कर्मचाऱ्यांनी यासाठी प्रयत्न केले आहेत. शेतपंपाला नियमित वीज पुरवठा होण्याकरिता एक पाऊल उचलले असून, लवकरच कायमस्वरूपी उपाययोजना होईल. याकरिता वरिष्ठ पातळीवर पाठपुरावा सुरू आहे.
- सचिन बनकर, उपकार्यकरी अभियंता, जावळी