तरडगाव : फलटण तालुक्यातील काळज ग्रामपंचायतीच्या सरपंचपदी संजय दादा गाढवे यांची, तर उपसरपंचपदी संगीता विठ्ठल देशमुख यांची बिनविरोध निवड झाली. निवडीनंतर फटाक्यांची आतषबाजी व गुलालाची उधळण करीत आंनदोत्सव साजरा करण्यात आला.
काळज ग्रामपंचायत निवडणुकीत राष्ट्रवादी पुरस्कृत राजे गटाच्या जय मल्हार पॅनलने निर्विवाद वर्चस्व प्रस्थापित केले होते. त्यानंतर बुधवारी झालेल्या पदाधिकाऱ्यांच्या निवडीत सरपंचपदासाठी संजय गाढवे व उपसरपंच पदासाठी संगीता देशमुख या दोघांचे अर्ज दाखल झाल्याने त्यांची बिनविरोध निवड झाल्याचे जाहीर करण्यात आले. यावेळी ग्रामपंचायत सदस्य रामचंद्र डोंबाळे, विजय शिंदे, नीता मोहिते, मंगल गाढवे, सुरेखा जाधव, जयश्री गाढवे, कैलास गाढवे उपस्थित होते.
विधान परिषदेचे सभापती रामराजे नाईक - निंबाळकर, आमदार दीपक चव्हाण, जिल्हा परिषदेचे माजी अध्यक्ष संजीवराजे नाईक - निंबाळकर आदींनी नवनिर्वाचित पदाधिकारी यांचे कौतुक केले. यावेळी विठ्ठल काकडे, सावळाराम गाढवे, विठ्ठलराव गाढवे, हणमंतराव गाढवे, नामदेवराव गाढवे, भिकाजी करळे, दत्तोबा गाढवे, हणमंत गायकवाड आदी मान्यवर, ज्येष्ठ नागरिक व ग्रामस्थ उपस्थित होते. निवडणूक निर्णय अधिकारी म्हणून आर. यू. पात्रेकर यांनी कामकाज पाहिले. त्यांना ग्रामसेवक आर. डी. कदम यांनी सहकार्य केले.
फोटो : २४ काळज
फलटण तालुक्यातील काळज ग्रामपंचायतीच्या सरपंचपदी संजय गाढवे व उपसरपंचपदी संगीता देशमुख यांची बिनविरोध निवड झाल्यानंतर पदाधिकाऱ्यांकडून त्यांचा सत्कार करण्यात आला.