कोरेगाव : ‘कोरेगाव तालुक्यात कोरोनाचा वेग वाढत असून, रुग्णसंख्येत
दिवसेंदिवस वाढ होत आहे. रुग्णसंख्या रोखण्यासाठी प्रशासनाने कठोर
उपाययोजना केल्या पाहिजेत, नियम तोडणाऱ्यांवर दंडात्मक कारवाई करा,’ असे
स्पष्ट निर्देश जिल्हाधिकारी शेखर सिंह यांनी दिले.
कोरेगाव प्रांत कार्यालयात कोरोनाविषयक आढावा बैठकीत ते बोलत होते.
जिल्हा परिषदेचे मुख्य कार्यकारी अधिकारी विनय गौडा, पोलीस अधीक्षक
अजयकुमार बन्सल, प्रांताधिकारी ज्योती पाटील, उपविभागीय पोलीस अधिकारी
गणेश किंद्रे, तहसीलदार अमोल कदम, गटविकास अधिकारी क्रांती बोराटे,
ग्रामीण रुग्णालयाचे वैद्यकीय अधीक्षक डॉ. युवराज करपे, तालुका आरोग्य
अधिकारी डॉ. राजेंद्र जाधव यांच्यासह मान्यवर उपस्थित होते.
जिल्हाधिकारी म्हणाले, ‘नियमांचे पालन न केल्याने रुग्णसंख्या
वाढीस हातभार लागला असून, प्रशासनाने विशेषत: पोलीस यंत्रणेने दंडात्मक
कारवाईस सुरुवात करावी. कोणत्याही परिस्थितीत नियमांचे पालन झालेच
पाहिजे, मंगल कार्यालयांना नोटिसा बजावून चालणार नाही, विवाह सोहळ्यावेळी
पाहणी करून, परवानगीपेक्षा जास्त लोक असल्यास तत्काळ कारवाई करा, अशा
सूचना त्यांनी दिल्या.
यावेळी विनय गौडा व अजयकुमार बन्सल यांनी प्रशासनाला अभिप्रेत असे काम
झाल्यास कोरोनाच्या प्रसाराचा वेग आपोआप कमी होईल,’ असे स्पष्ट केले.
ज्योती पाटील, गणेश किंद्रे, अमोल कदम, डॉ. युवराज करपे, डॉ. राजेंद्र
जाधव यांच्यासह कोरेगाव व रहिमतपूरच्या मुख्याधिकाऱ्यांनी आजवर केलेल्या
उपाययोजना व कारवाईची माहिती दिली.
चौकट :
२८ तारखेला विशेष लक्ष द्या...
२८ फेब्रुवारी रोजी विवाह मुहूर्त जास्त असून, त्यादिवशी जास्त प्रमाणात
गर्दी कशी टाळता येईल, याकडे प्रशासनाने विशेषत: पोलीस दलाने लक्ष केंद्रित करावे. दंडात्मक कारवाई वाढवा, कोणत्याही परिस्थितीत नियमांचे
तंतोतंत पालन झालेच पाहिजे, अशा सूचना जिल्हास्तरीय अधिकाऱ्यांनी दिल्या.