शिरवळ : आशियाई महामार्गावरील शिरवळ (ता. खंडाळा) गावच्या हद्दीत दूध टँकरने दुचाकीला पाठीमागून दिलेल्या धडकेत दुचाकीचालक जागीच ठार झाला असून, पत्नी जखमी झाली आहे.
संजय दिनकर बनसोडे (वय ३८, रा. आंबेडकरनगर, पानवण, ता. माण), असे जागीच ठार झालेल्या दुचाकीचालकाचे नाव आहे, तर स्मिता संजय बनसोडे (वय २८), असे जखमी झालेल्या पत्नीचे नाव आहे.
याबाबतची शिरवळ पोलिसांनी दिलेली अधिक माहिती अशी की, पानवण (ता. माण) येथील संजय बनसोडे हे चाकण, पुणे याठिकाणी आपल्या कुटुंबीयांसमवेत कामाकरिता आहे. दरम्यान, पत्नी स्मिता बनसोडे यांचा मावस भाऊ मयत झाल्याने संजय बनसोडे हे पत्नीसमवेत दुचाकी (एमएच-१० बीडी-६९५०) वरून निघाले असता शिरवळ (ता. खंडाळा) गावाच्या हद्दीमध्ये एसटी स्टँडलगत आले असता पाठीमागून भरधाव वेगाने आलेल्या दूध टँकर (एमएच-११ एएल-८२९९) ने त्यांना जोरदार धडक दिली. ही धडक एवढी भीषण होती की, या धडकीमध्ये दुचाकीचालक संजय बनसोडे हे गंभीर जखमी झाले. यावेळी संबंधितांना शिरवळ येथील खासगी रुग्णालयात दाखल केले असता संजय बनसोडे यांना डाॅक्टरांनी तपासून मृत घोषित केले. या घटनेची फिर्याद स्मिता बनसोडे यांनी शिरवळ पोलीस स्टेशनला दिली असून, अधिक तपास सहायक पोलीस उपनिरीक्षक अनिल बारेला हे करीत आहेत.