शिरवळ : दारू अड्ड्यांवर केलेल्या कारवाईचा राग मनात धरून मुंबई येथील राज्य उत्पादन शुल्क विभाग अधिकाऱ्यांच्या गाडीवर हातभट्टी- चालकांनी काठ्या, सोडा वॉटर व बीअरच्या बाटल्या फेकून हल्ला केला. याप्रकरणी शासकीय कामात अडथळा आणून गाडीचे नुकसान केल्याप्रकरणी चौघांविरुद्ध शिरवळ पोलीस ठाण्यात गुन्हा दाखल झाला आहे. ही घटना सायंकाळी सव्वासहाच्या सुमारास घडली.पोलिसांच्या माहितीनुसार, वीर हद्दीतील वीर धरणाजवळील कालव्याजवळ हातभट्टीच्या दारू अड्ड्यांवर मुंबईतील राज्य उत्पादन शुल्क विभागाच्या दुय्यम निरीक्षक नारायण रामदास मुंजाळ, डी. आर. शिंदे, हवालदार एम. के. कवडे, पी. डी. भोजने, पी. टी. कदम व डी. एम. पाटील यांनी छापा टाकला. पथकाने छापा टाकल्यानंतर ३ लाख ९५ हजार ५०० रुपयांची गावठी दारूचा मुद्देमाल जप्त करीत नष्ट केला. त्यानंतर हे भरारी पथक पुणे बाजूकडे जीपमधून (एमएच ०१ एएन १४७६) निघाले होते. शिदेंवाडी हद्दीत ते आले असता पाठीमागून कारमधून (एमएच १२ बीपी २७७) तिघे आले. त्यांनी भरारी पथकातील गाडीच्या चालकाला ‘हातभट्टी मालक कुमार म्हस्के शेठने तुम्हाला बोलाविले आहे,’ असे सांगितले. यावेळी कारमध्ये सोडा वॉटर, बीअरच्या बाटल्या व काठ्या पाहून अधिकाऱ्यांनी गाडी थांबविली नाही. तेव्हा कारमधील तिघांनी सिनेस्टाईल पाठलाग करीत जीप अडविण्याचा प्रयत्न केला. दरम्यान, सोडा वॉटर, बीअर बाटल्या व काठ्यांनी हल्ला केल्याने जीपचे सुमारे सात हजारांचे नुकसान झाले. याप्रकरणी हातभट्टीचालक कुमार म्हस्के व त्याच्या तीन साथीदारांवर गुन्हा दाखल केला आहे. (प्रतिनिधी)
अधिकाऱ्यांच्या गाडीवर हातभट्टीचालकांचा हल्ला !
By admin | Updated: October 30, 2015 23:27 IST