पत्नीचा खून करून आईसह स्वत:लाही चाकूने भोसकले, दोघेही गंभीर

घरगुती वादातून एका व्यक्तीने पत्नीसह आईच्या पोटात चाकूने भोसकून स्वत:ही आत्महत्येचा प्रयत्न केला.

उंब्रज (सातारा) : घरगुती वादातून एका व्यक्तीने पत्नीसह आईच्या पोटात चाकूने भोसकून स्वत:ही आत्महत्येचा प्रयत्न केला. यामध्ये पत्नी मोहिणी सागर घोरपडे हिचा उपचारादरम्यान मृत्यू झाला. तर सागर सदाशिव घोरपडे व आई कल्पना हे दोघे जखमी झाले. त्यांच्यावर क-हाड येथील कृष्णा हॉस्पिटलमध्ये उपचार सुरू आहेत. ही घटना शुक्रवारी रात्री साडेदहाच्या सुमारास घडली.घटनास्थळ व पोलिसांकडून मिळालेली माहिती अशी की, क-हाड तालुक्यातील व-हाडे येथे सागर घोरपडे (वय ४०) हे पत्नी मोहिनी (३२), आई कल्पना (५८) यांच्यासमवेत राहतात. त्यांच्यात शुक्रवारी रात्री साडेदहाच्या सुमारास वाद निर्माण झाला. त्यातून सागरने पत्नी व आईला राहत्या घराच्या पाठीमागील खोलीत नेले. तेथे त्याने दोघींनाही चाकूने भोसकले. त्यानंतर स्वत:च्या पोटात चाकू भोसकून आत्महत्येचा प्रयत्न केला.यावेळी आरडाओरडा झाल्याने आजूबाजूच्या लोकांनी घराकडे धाव घेतली. त्यांनी जखमी तिघांनाही क-हाड येथील रुग्णालयात हलविले. मात्र मोहिनी हिचा उपचारापूर्वीच मृत्यू झाला. तर आई व सागर हे दोघेही गंभीर जखमी आहेत. याची तळबीड पोलीस ठाण्यात नोंद झाली आहे.