कोरेगाव : ‘कोरेगाव नगरपंचायतीच्या कर्मचाऱ्यांची आरोग्यविषयक सर्वतोपरी काळजी घेतली जात आहे. त्यांना आवश्यक सर्व सहकार्य केले जाईल,’ अशी ग्वाही आमदार महेश शिंदे यांनी दिली.
कोरेगाव नगरपंचायतीच्या १०५ कर्मचाऱ्यांचा सामूहिक आरोग्य विमा उतरविण्यात आला. कर्मचाऱ्यांच्या हिश्याची ५० टक्के रक्कम आमदार शिंदे यांनी स्वत: भरली. या कर्मचाऱ्यांना विमा योजनेच्या कागदपत्रांचे वितरण शनिवारी करण्यात आले. त्यावेळी ते बोलत होते. यावेळी राहुल प्र. बर्गे, सुनील खत्री, संतोष जाधव, माजी नगराध्यक्ष राजाभाऊ बर्गे, नगरसेवक जयवंत पवार, महेश बर्गे, राहुल र. बर्गे, सुनील बर्गे, निवास मेरुकर उपस्थित होते.
आमदार शिंदे म्हणाले, ‘कोरोना काळात कमी पगारात नगरपंचायतीचे कर्मचारी जिवाची पर्वा न करता काम करत आहेत. अनेक महिने त्यांचे पगार होत नाहीत. त्यांच्या शासन सेवेतील समावेशनाचा प्रश्न प्रलंबित आहे. याबाबत नगरविकासमंत्री एकनाथ शिंदे यांच्यासमवेत चर्चा झाली असून, त्यांनी दोन दिवसांत बैठक बोलविणार असल्याचे स्पष्ट केले. एकाही कर्मचाऱ्याचा हक्क हिरावून घेतला जाणार नाही. ज्या दिवशी नगरपंचायतीची स्थापना झाली. त्या दिवसापासून कर्मचारी वर्गाला सामावून घेतले गेले पाहिजे, अशी भूमिका आहे. नगरविकासमंत्र्यांनी सकारात्मक दृष्टिकोन दाखविला आहे.’
यावेळी नगरपंचायत कर्मचारी संघटनेचे पदाधिकारी अजित बर्गे, प्रकाश बर्गे, धनंजय पंडित, धनंजय भुजबळ, प्रताप बुधावले, सुरज मदने, संतोष सरगडे, गौतम येवले, बबन पाटोळे, रामचंद्र बोतालजी आदींनी अडचणी मांडल्या. त्यावर जिल्हाधिकारी, जिल्हा प्रशासन अधिकारी यांच्याशी चर्चा करून मार्ग काढण्याची ग्वाही आमदार शिंदे यांनी दिली.