सातारा : कोरोनात महागाईचीच झळ बसत असून, घरगुती गॅस सिलिंडर टाकी नुकतीच २५ रुपयांनी महागली. तर वर्षभरात जवळपास २५० रुपयांनी वाढ झाली आहे. तर व्यावसायिक टाकीही वर्षात ४०० रुपयांनी वाढली. यामुळे जगायचे कसे हा प्रश्न असून गृहिणींना चिंता गॅस पेटविण्याची आहे. त्यामुळे पुन्हा चुली पेटू लागल्या आहेत.
मागील सवा वर्षापासून कोरोना महामारीचं संकट आहे. यामुळे कामे बंद पडत आहेत. अनेकांचा रोजगार गेला. कोणाला कामावरुन घरी बसावे लागले. अशातच गेल्या वर्षभरात इंधन तसेच गॅस सिलिंडरचे दर सतत वाढत आहेत. यामुळे महागाईची फोडणी अधिकच बसू लागली आहे. विशेष करुन सामान्य कुटुंबही आज सिलिंडरवर अवलंबून आहे. अशावेळी घरगुती सिलिंडर टाकीचे भाव सतत वाढत चालले आहेत.
काही दिवसांपूर्वी टाकीमागे २५ रुपयांची वाढ करण्यात आली. यामुळे ८४० रुपयांपर्यंत टाकी पोहोचली. साधारणपणे पाच माणसांच्या कुटुंबाला महिन्याला एक टाकी लागते. याचा हिशोब केला तर महिन्याला एका टाकीसाठी ८४० रुपये मोजावे लागणार आहेत. कोरोनाच्या या काळात सामान्यांना हे परवडणारे नाही.
........................
ऑगस्ट २०२० ते डिसेंबर २० मध्ये झालेली वाढ
घरगुती व्यावसायिक
ऑगस्ट ५९९ ११४१
सप्टेंबर ५९९ ११३९
ऑक्टोबर ५९९ ११६४
नोव्हेंबर ५९९ १२४०
डिसेंबर ६९९ १३३१
.............................
जानेवारी २०२१ ते जुलैपर्यंत दरवाढ
जानेवारी ६९९ १३४८
फेब्रुवारी ७९९ १५३९
मार्च ७९९ १५३३
एप्रिल ८१४ १६४६
मे ८१४ १६००
जून ८१४ १५०१
जुलै ८३९ १५६२
.....................................
घरखर्च भागवायचा कसा ?
कोरोना विषाणू संकटामुळे वर्षभरापासून कामे मिळवताना अडचणी येत आहेत. अनेकवेळा घरातच बसून राहण्याची वेळ घरातील पुरुष मंडळीवर आली आहे. त्यातच सिलिंडर टाकीचे दर वाढल्याने चूल पेटविण्याची वेळ आली आहे.
- नीलिमा पाटील, गृहिणी
............................................
मागील वर्षभरापासून महागाईचाच सामना करावा लागत आहे. कारण, भाज्या महागच आहेत. पण, आता सिलिंडरचाही भाव वाढलाय. त्यामुळे अशीच वाढ होत राहिली तर जगायचे कसे हा आमच्यापुढे प्रश्न आहे.
- शांता काळे, गृहिणी
..................................................
डिसेंबरपासून सतत वाढ...
मागील एक वर्षाचा विचार करता घरगुती सिलिंडर टाकीचा दर ५९९ वरुन ८३९ रुपयांवर पोहोचलाय. डिसेंबरमध्ये १०० रुपयांनी वाढ झाल्याने टाकी ६९९ वर गेली. त्याचबरोबर फेब्रुवारीत ७९९, एप्रिलमध्ये ८१४ तर आता जुलै महिन्यात ८३९ रुपये झाली आहे.
..........................................................
ग्रामीण भागात चुलीवर स्वयंपाक...
- शहरी भागात चुली बंद झाल्या आहेत. गॅसवरच सर्व स्वयंपाक होतो. त्यामुळे शहरवासीयांना सिलिंडरशिवाय पर्याय राहिलेला नाही.
- केंद्र शासनाच्या माध्यमातून ग्रामीण भागातही गॅस आणि सिलिंडर मिळाला. यामुळे गरिबांच्या घरीही शेगडी पेटली. पण, आता सिलिंडरची किंमत सतत वाढत चालल्याने चूल पेटविण्याची वेळ आली आहे.
- सध्यस्थितीत ग्रामीण भागातील अनेक गरीब कुटुंबे हे आवश्यकता असेल तरच स्वयंपाकासाठी गॅस पेटवतात. नाहीतर चुलीवरच भाजी व भाकरी केली जाते.
......................................................................................