‘लोकमत’वर शुभेच्छांचा वर्षाव

वर्धापनदिन : ‘राजकारण सातारी’ अंकाचे प्रकाशन

  सातारा : ‘लोकमत’च्या सातारा आवृत्तीचा आठवा वर्धापन दिन आज, शुक्रवारी मोठ्या उत्साहात साजरा झाला. यानिमित्ताने आयोजित स्नेहमेळाव्यास सर्वच स्तरातील मान्यवर आणि नागरिकांनी उपस्थित राहून ‘लोकमत’वर शुभेच्छांचा वर्षाव केला. वर्धापनदिनानिमित्त ‘राजकारण सातारी’ या विशेषांकाचे प्रकाशन पोलीस अधीक्षक अभिनव देशमुख आणि अन्य मान्यवरांच्या हस्ते करण्यात आले. ‘लोकमत’च्या सातारा आवृत्तीच्या वर्धापनदिनानिमित्त हॉटेल राधिका पॅलेसच्या हिरवळीवर स्नेहमेळावा आयोजित करण्यात आला होता. या स्नेहमेळाव्यास राजकीय, सामाजिक, सांस्कृतिक, शैक्षणिक, क्रीडा, पर्यावरण, उद्योग, व्यापार आणि अन्य सर्वच क्षेत्रातील मान्यवरांनी मेळाव्यास हजेरी लावली होती. यावेळी गप्पांचे फडही चांगलेच रंगले होते. हा मेळावा रात्री उशिरापर्यंत रंगला होता. यावर्षी जिल्ह्यातील राजकीय प्रवाह, व्यक्ती, प्रभावी घटक, राज्य आणि राष्ट्रीय पातळीवर परिणामकारक ठरलेल्या व्यक्ती आणि संघटना, सामाजिक चळवळी यांचा इतिहास, प्रभाव आणि परिणामकारकता दर्शविणारी ‘राजकारण सातारी’ ही संग्राह्य पुरवणी तयार करण्यात आली. तिचे औपचारिक प्रकाशन स्नेहमेळाव्याच्या प्रारंभी करण्यात आले. तत्पूर्वी अभिनव देशमुख यांच्यासह गौरीशंकर नॉलेज सिटीचे मदन जगताप, यशोदा शिक्षण संस्थेचे दशरथ सगरे, आम आदमी पक्षाचे राजेंद्र चोरगे, जिल्हा परिषदेचे माजी उपाध्यक्ष चंद्रकांत जाधव आदी मान्यवरांच्या हस्ते दीपप्रज्वलन करण्यात आले. ‘लोकमत’चे सरव्यवस्थापक मकरंद देशमुख, संपादक वसंत भोसले, वरिष्ठ शाखा व्यवस्थापक विजय पोवार, आवृत्तीप्रमुख सचिन जवळकोटे आणि जाहिरात विभागाचे सहायक व्यवस्थापक संतोष जाधव यावेळी उपस्थित होते. प्रारंभी ‘एबीसीडी डान्स स्टुडिओ’च्या कलावंतांनी नृत्यात्मक गणेश वंदना सादर केली. अमोल कदम, मारूफ नरवाडे, आकाश जाधव, वैभव कुंभार, अमित काळेल, अक्षय खांडेकर आणि विशाल निकम या कलावंतांनी यात सहभाग घेतला. जिल्हाधिकारी डॉ. रामास्वामी एन., कल्पनाराजे भोसले, आमदार जयकुमार गोरे, माजी जिल्हा परिषद उपाध्यक्ष चंद्रकांत जाधव यांच्यासह अनेक मान्यवरांनी स्नेहमेळाव्यास उपस्थित राहून ‘लोकमत’च्या वाटचालीस शुभेच्छा दिल्या. तसेच ‘राजकारण सातारी’ अंकाबद्दल प्रशंसोद््गार काढले. खरेदीसाठी सातारकर मोठ्या शहरांना पसंती देत असल्यामुळे सातारच्या बाजारपेठेतील निरुत्साही वातावरण बदलण्यासाठी यावर्षी ‘आमची खरेदी सातार्‍यात’ ही मोहीम ‘लोकमत’ने राबविली होती. त्यामुळे दसरा-दिवाळीला बाजारपेठेतील हालचाल अनेक पटींनी वाढली. या मोहिमेबद्दलही उपस्थितांनी ‘लोकमत’चे कौतुक केले. (प्रतिनिधी)