अडीचशे जणांवर गुन्हा दाखल

तीव्र पडसाद

सातारा : सोशल मीडियावर महापुरुषांबद्दल आक्षेपार्ह मजकूर व छायाचित्रे पोस्ट करण्याच्या प्रकारणाचे तीव्र पडसाद उमटल्यानंतर गर्दी, मारामारी, दंगा करणे, चिथावणी देणे, मालमत्तेचे नुकसान करणे आदी कलमांखाली पोलिसांनी जिल्ह्यातील सुमारे २५० जणांवर गुन्हा नोंद केला आहे. सातारा शहर पोलिसांनी संशयितांची धरपकड सुरू केली असून, आतापर्यंत सुमारे ३५ जणांना अटक केलेली आहे. सोशल मीडियावर महापुरुषांबद्दल आक्षेपार्ह मजकूर व छायाचित्रे पोस्ट करण्याच्या घटनेचे सातारा जिल्ह्यात तीव्र पडसाद उमटले होते. सातारा शहर पोलीस ठाण्यात याप्रकरणी विविध कलमांखाली आठ तक्रारी दाखल करून सुमारे १५० हून अधिक जणांवर गुन्हा नोंद केला आहे. यामधील सुमारे ३५ जणांना आतापर्यंत अटक करण्यात आलेली आहे. त्यातील काहीजणांची जामिनावर सुटका झाली तर काहीना न्यायालयीन कोठडी मिळाली आहे. तसेच यामधील १२ जणांना पुन्हा दुसर्‍या गुन्ह्यात ताब्यात घेण्यात आले आहे. कोरेगाव पोलीस ठाण्यात ६४ जणांच्याविरोधात गुन्हा नोंद झाला आहे. विविध कलमांखाली संबंधितांवर हे गुन्हे नोंद झाले आहेत. फलटण तालुक्यात १२ जणांवर गुन्हा नोंद झाला असून, त्यांना अटक केल्याचे पोलिसांनी सांगितले. उदयनराजे मित्र मंडळाकडून निवेदन सोशल मीडियाच्या माध्यमातून खासदार उदयनराजे भोसले यांच्याविषयी बदनामीचा धांदात खोटा, असत्य आणि अफवा पसरविणारा मजकूर प्रसिद्ध होत असल्याच्या निषेधार्थ उदयनराजे भोसले मित्र मंडळाच्या वतीने पोलीस अधीक्षक डॉ. अभिनव देशमुख यांना निवेदन देण्यात आले. या निवेदनात संबंधितांवर कारवाई करण्याची मागणी करण्यात आली आहे. या निवेदनात म्हटले आहे की, उदयनराजे भोसले यांच्याविषयी दोन दिवसांपासून सोशल मीडियाच्या माध्यमातूून बदनामीचा धांदात खोटा मजकूर प्रसिद्ध होत आहे. एका प्रार्थनास्थळाचा फोटो सोशल मीडियावर टाकून चुकीचा संदेश पसरवला जात आहे. जो पूर्णत: निंदणीय आहे. अशा बदनामी करणार्‍या व खोडसाळ प्रवृत्तींचा सायबर क्राईम अन्वये गुन्हा नोंद करून तातडीने बंदोबस्त करावा, अशी आमची मागणी आहे.या निवेदनावर सतीश पवार, विजय पवार, संजय शिंदे, प्रशांत सावंत, संग्राम बर्गे, विजय बडेकर, सरपंच रवींद्र पाटेकर, चंद्रशेखर घोडके आदींच्या सह्या आहेत.