- प्रमोद सुकरे
लोकमत न्यूज नेटवर्क कराड : कराड येथे 'एआय' चा घातक वापर करुन महिला डॉक्टरांचे अश्लील व्हिडिओ तयार करून व्हाट्सअप वर व्हायरल करण्याचा धक्कादायक प्रकार घडला आहे. त्यामुळे कराडच्या वैदिक क्षेत्रात खळबळ उडाली आहे. संशयित आरोपीच्या किलेक्शन थेरपी सेंटर विरोधात विविध संघटनांनी तक्रारी केल्या होत्या. त्याबद्दलची पाहणी करून आरोग्य विभागाला निगेटिव्ह रिपोर्टिंग केल्याच्या रागातून आरोपी डॉ. राजेश शिंदे याने 'एआय'च्या माध्यमातून २ महिला डॉक्टरांसह चौघांचे अश्लील व्हिडिओ बनवल्याची धक्कादायक समोर येत आहे.
एआय तंत्रज्ञानाचा वापर करून कराड शहरातील दोन महिला डॉक्टरांसह एका तरूणी आणि एका तरूणाचा अश्लील व्हिडीओ बनविण्यात आल्याची खळबळजनक घटना उघडकीस आल्यानंतर संशयित आरोपीने हे कृत्य का केले? याचीही माहिती आता समोर येऊ लागली आहे. कराड शहराच्या पूर्वेकडे संशयित आरोपी राजेश शिंदे यांचे किलेक्शन थेरपी सेंटर आहे. तेथील उपचारा संदर्भात काही संघटनांनी जिल्हा आरोग्य विभागाकडे तक्रारी केल्या होत्या.
तक्रारीच्या अनुषंगाने वरिष्ठ अधिकाऱ्यांनी पाहणी करून अहवाल देण्याची सूचना शासकीय वैद्यकीय सूत्रांना केली होती. त्यानुसार समक्ष थेरपी सेंटरची पाहणी केल्यानंतर तक्रारीमध्ये तथ्य आढळून आले त्यानुसार संबंधित तपासणी अधिकाऱ्यांनी तसा अहवाल आरोग्य विभागाकडे पाठवला. या सर्व घटनेचा राग मनात धरून डॉ. राजेश शिंदे याने २ महिला डॉक्टरांसह एक तरुणी आणि एका तरुणाचा एआय तंत्रज्ञानाचा वापर करून अश्लील व्हिडिओ बनवला.
डॉ. राजेश शिंदे याने पंजाबमधील त्याच्या परिचयाच्या विकास शर्मा याला सदर व्हिडिओ पाठवले. तसेच या संबंधित डॉक्टरांचे नंबर्स पाठवून व्हाट्सअप ग्रुप तयार करायला सांगितला. त्या ग्रुपमध्ये अश्लील व्हिडिओ शर्मा याने डॉक्टर राजेश शिंदे यांच्या सांगण्यावरून शेअर केले अशी माहिती तपासात समोर येत आहे.
याप्रकरणी कराडमधील नामांकित डॉक्टरसह दोघांवर कराड शहर पोलीस ठाण्यात गुन्हा नोंद झाला आहे. दरम्यान, संशयित डॉक्टरने अश्लील व्हिडिओ पंजाबमधील मित्राकडून तयार करून घेतल्याचे समजते