सातारा : जिल्ह्यामध्ये कोविड-१९ मुळे दोन पालक गमावलेल्या १० बालकांना व एक पालक गमावलेल्या ४१ बालकांना अशा एकूण ५१ बालकांना बालकल्याण समिती, सातारा यांच्यामार्फत बालसंगोपन योजनेचा लाभ देण्यात आला आहे.
तसेच जिल्हा परिषदेकडून प्राप्त झालेल्या यादीतील २ हजार ३९५ विधवांपैकी ४२२ महिलांना जिल्हाधिकारी कार्यालयाकडे संजय गांधी निराधार योजना, श्रावणबाळ योजना, इंदिरा गांधी विधवा योजना व राष्ट्रीय कुटुंब लाभ योजना, इ. योजनांचा लाभ देण्यात येणार आहे, अशी माहिती सदस्य सचिव, कृती दल तथा जिल्हा महिला व बालविकास अधिकारी आर. एस. ढवळे यांनी जिल्हाधिकारी शेखर सिंह यांच्या अध्यक्षतेखाली झालेल्या कृती दल समितीच्या बैठकीवेळी दिली. या बैठकीस कृती दलातील सर्व सदस्य उपस्थित होते.
कोविड-१९ मुळे अनाथ झालेल्या १२ बालकांना ज्या शाळेत दाखल केले आहे, त्यांपैकी ११ बालकांची शैक्षणिक फी त्या शाळांनी व महाविद्यालयांनी माफ केली आहे. उर्वरित दोन पालक व एक पालक गमावलेल्या बालकांच्या शैक्षणिक फी माफीबाबत व सामाजिक संस्थेची मदत घेऊन शैक्षणिक फी भरण्याबाबतची कार्यवाही सुरू असल्याची माहिती ढवळे यांनी यावेळी दिली.