य. पा. वाडीतील रस्ते कामात भ्रष्टाचार

लोकमत न्यूज नेटवर्क

आटपाडी : आटपाडी तालुक्यातील यमाजी पाटील वाडी गावामध्ये जिल्हा परिषदेच्या जनसुविधा योजनेअंतर्गत झालेल्या रस्ते कामात ठेकेदार व अधिकारी यांनी संगनमत करून भ्रष्टाचार केला आहे, असा आरोप ग्रामपंचायत सदस्य माणिक तळे यांनी केला आहे. याबाबत मुख्यकार्यकारी अधिकारी व गटविकास अधिकारी यांच्याकडे अर्ज देऊन चौकशीची मागणी केली आहे. तसेच संबंधित अधिकारी, ठेकेदारावर फौजदारी गुन्हे दाखल करण्याची मागणी केली आहे.

य. पा. वाडीतील तळेवस्तीकडे जात असणारा रस्ता जिल्हा परिषद सदस्य अरुण बालटे यांच्या सहकार्याने जिल्हा परिषदेच्या जनसुविधा योजनेअंतर्गत झाला आहे. करगणी येथील श्री राम मजूर सहकारी सोसायटीने हे काम केले आहे. चार लाख रुपये या रस्त्यावरती खर्च केले असून, खडीकरण व एक पूल बनविताना १० सिमेंट पाईप टाकण्याचे काम होते. मात्र, ठेकेदाराने काम करत असताना पूल बनविताना फक्त दोनच सिमेंट पाईप टाकल्या आहेत. काम होत असताना तळेवस्ती येथील नागरिकांनी गटविकास अधिकारी यांना निवेदन देत काम चुकीच्या पद्धतीने झाल्याची तक्रार केली आहे. कामाची प्रत्यक्ष पाहणी करून त्याचे मूल्यांकन करावे व जितके काम झाले आहे, तितकेच पैसे संबंधित ठेकेदाराला द्यावेत, अशी मागणी केली होती. मात्र, ठेकेदाराने पुलासाठी दहा पाईप मंजूर असताना फक्त दोनच पाईप टाकत काम आटोपून घेतले आहे. ठेकेदार व अधिकाऱ्यांनी संगनमताने हा भ्रष्टाचार केला असून, शासनाची फसवणूक करत जनतेच्या पैशावर डल्ला मारण्याचा प्रकार घडला आहे, याची चौकशी करण्याची मागणी केली आहे.