वशी : गावातील सर्व महिलांनी एकत्र येऊन वर्गणी स्वरूपात रक्कम गोळा करून सरपंचांचा सपत्निक सत्कार करण्याचा अनोखा कार्यक्रम लाडेगाव येथे पार पडला.
लाडेगाव (ता. वाळवा) येथील लोकनियुक्त सरपंच रणधीर ऊर्फ राजू पाटील हे राजकारणाशी कोणताही संबंध नसताना शालेय जीवनापासूनच गावाची सेवा करत आहेत. मित्रांचे संघटन करून पाटील यांनी गावातील पिण्याच्या पाण्याचे आड व विहिरी स्वच्छ करून सुशोभिकरण करणे, गावाच्या रस्त्यांच्या कडेला शोभेची झाडे लावणे, संपूर्ण गाव निर्जंतुकीकरण करणे यासारखी कामे केली आहेत. लोकसहभागातून गावाबाहेरील ओढ्यातील घाण काढून ओढ्याचे रुंदीकरण करून बंधारे बांधले. यामुळे चार वर्षांपासून गावातील विहिरी पाण्याने तुडुंब भरल्या आहेत.
याचेच फलित म्हणून २०१७ च्या ग्रामपंचायत निवडणुकीमध्ये गावकऱ्यांनी राजू पाटील यांच्या गळ्यात लोकनियुक्त सरपंच पदाची माळ घातली. गावात आतापर्यंत १५ कोटीची कामे पूर्ण केली आहेत. गावाचा चेहरामोहराच बदलून टाकला आहे.
त्यांच्या सत्कारासाठी गावातील वैशाली पाटील, संगीता दाईंगडे, नम्रता पाटील, अनिता पाटील, जयश्री दाईंगडे, ग्रामपंचायत सदस्या धनश्री पाटील, वैशाली पाटील, मनीषा जाधव, पूनम मदने, अनुराधा पाटील यांनी पुढाकार घेतला होता.
फोटो - ०१०२२०२१-आयएसएलएम- वशी न्यूज
: लाडेगाव येथील सरपंच राजू पाटील यांचा ग्रामस्थांनी सपत्निक सत्कार केला.