राष्ट्रवादी भाजपच्या दावणीला बांधण्याचा अधिकार कोणी दिला?

बोरगाव : वाळवा तालुक्यातील राष्ट्रवादी पक्ष भाजपच्या दावणीला बांधण्याचा अधिकार तालुकाध्यक्ष विजय पाटील यांना कोणी दिला? राष्ट्रवादीची भूमिका जयंत पाटील ठरवतात, पण कृष्णा कारखान्याच्या निवडणुकीत राष्ट्रवादीचा पाठिंबा भाजपच्या सुरेश भोसले यांना असल्याचे सांगून पक्ष आणि जयंत पाटील यांना बदनाम करण्याचा उद्योग विजय पाटील करत असल्याचे मत राजारामबापू सूतगिरणीचे संचालक उदयसिंह शिंदे यांनी व्यक्त केले.

बोरगाव येथे कृष्णा कारखान्याच्या सभासद बैठकीत ते बोलत होते.

शिंदे म्हणाले की, अविनाश मोहिते राष्ट्रवादीचे सरचिटणीस आहेत, तर जयंत पाटील प्रदेशाध्यक्ष आहेत. आम्ही पक्षाचे पदाधिकारी कारखान्यातील सत्ताधारी भाजपच्या म्हणजे भोसले गटाच्या विरोधात आहेत. त्यामुळे जयंत पाटील यांच्या पश्चात पक्षाची भूमिका परस्पर स्पष्ट करणे बालीशपणाच आहे.

विजय पाटील हे जयंत पाटील यांच्यावर भोसले कुटुंबाने केलेले आघात विसरले असावेत. राजारामबापूंच्या निधनानंतर जयंत पाटील आमदारकीच्या निवडणुकीला उभारणार होते, त्यावेळी जयवंतराव भोसले यांनी त्यांचे वय कमी असल्याबाबत जन्मतारखेचा दाखला देऊन पाच वर्षे राजकीय खच्चीकरण केले. जयंत शुगर कारखाना पेठनाक्यावर उभा करण्याचा घाटही घातला होता. सुरेश भोसले यांनी मुलाला भाजपचा आमदार करण्यासाठी वाळवा तालुक्यातील दोन हजार कामगारांच्या कुटुंबांचे मतदान कराडमध्ये नेण्याचा प्रयत्न केला होता. जयंत पाटील यांची भूमिका विजय पाटील यांनी कृष्णा चॅरिटेबल ट्रस्टवरून जाहीर करू नये. करायचीच असेल तर स्वत: भोसले पितापुत्रांनी जाहीर करावी.

शिंदे म्हणाले की, आम्ही सर्व राष्ट्रवादीचे पदाधिकारी जयंत पाटील यांना भेटून याबाबत कारवाईची मागणी करणार आहोत.

नेर्लेचे सुभाष पाटील, सुरेश पाटील, शिवराज जाधव, संभाजी दमामे, वसंत पाटील, महेश पवार, केदार शिंदे उपस्थित होते.