लोकमत न्यूज नेटवर्क
विटा : कोरोना संसर्गाच्या महामारीत आता जवळचे रक्तातील नातेवाईकही दुरावल्याचे चित्र आज सर्वत्र पहावयास मिळत आहे. अशा परिस्थितीत कोरोनाग्रस्त रुग्णाचा मृत्यू झाल्यास त्या रुग्णावर अंत्यसंस्कार करण्यासाठी घरातील कोणीही येत नाही. अशा वेळी विटा न.प.चे कोरोना योद्धे जीवाची पर्वा न करता कोरोनाने मृत्यू झालेल्या रुग्णांवर नातेवाईक बनून अंत्यसंस्कार करीत आहेत. विटा शहरातील कऱ्हाड रस्त्यावर असलेल्या वैकुंठधाम स्मशानभूमीत गेल्या वर्षभरात कोरोनाने मृत्यू झालेल्या सुमारे पावणे दोनशेहून जास्त मृतांवर पालिकेच्या कर्मचाऱ्यांनी अंत्यसंस्कार केले आहेत.
सध्या कोरोनाच्या दुसऱ्या लाटेने उग्र रूप धारण केले आहे. विटा शहरासह खानापूर तालुक्यात दररोज शंभर ते दीडशे कोरोना पॉझिटिव्ह रुग्णांची भर पडत आहे. अशा परिस्थितीत विटा शहरातील पाच, खानापूर पूर्व भागातील दोन अशा एकूण ७ कोविड रुग्णालयात बेडची संख्या कमी पडू लागली आहे. त्यामुळे प्रशासनाची धावपळ सुरू असतानाच कोरोनाने मृत्यू झालेल्या रुग्णांवरही विटा येथे अंत्यसंस्काराचा विधी पार पाडला जात आहे.
सध्या खानापूर तालुक्यात दररोज चार ते पाच जणांचा कोरोनाने मृत्यू होत असल्याची माहिती मिळत आहे. या मृत रुग्णांवर विटा येथील वैकुंठधाम स्मशानभूमीत अंत्यसंस्कार केले जात आहेत. काही मृत रुग्णांच्या नातेवाइकांना कळवूनही ते अंत्यसंस्कार विधीकडे फिरकत नसल्याचे सांगण्यात येते. त्यामुळे अंत्यसंस्कार विधीसाठी विटा न.प.ने नेमून दिलेल्या कर्मचाऱ्यांना मृत रुग्णांचे नातेवाईक होऊन अंत्यविधी उरकून घ्यावा लागत आहे.
विटा स्मशानभूमीत गेल्यावर्षीपासून सुमारे पावणेदोनशे कोरोनाने मृत्यू झालेल्या रुग्णांवर पालिकेच्या कोरोना योद्धा टीमने अंत्यसंस्कार करून कर्तव्य बजावले. शनिवारी मुख्याधिकारी अतुल पाटील यांनी वैकुंठधाम स्मशानभूमीत जाऊन जीवाची पर्वा न करता स्वत:च्या कुटुंबापासून दूर राहत कोरोनाने मृत झालेल्या रुग्णांवर अंत्यसंस्कार करणाऱ्या टीमची विचारपूस करीत त्यांचे कौतुक केले.
चौकट :
मोफत अंत्यसंस्कार...
सध्या कोरोनाने थैमान घातले असून मृत्यूचा आकडा वाढत आहे. अशा परिस्थितीत मृत रुग्णांचे नातेवाईक स्मशानभूमीत येत नसल्याने अंत्यसंस्कारासाठी विटा न.प.ने कोविड योद्ध्यांच्या प्रत्येकी पाच जणांच्या दोन टीम तयार केल्या आहेत. कोरोनाने मृत्यू झालेल्या विटा शहरासह परिसरातील रुग्णांच्या मृतदेहांवर कराड रस्त्यावरील स्मशानभूमीत मोफत अंत्यसंस्कार करण्यात येत आहेत. त्यासाठी पालिकेच्या वतीने कोणतेही शुल्क आकारले जात नसल्याचे मुख्याधिकारी अतुल पाटील यांनी सांगितले.