मिरज : मुलीस नांदवण्यास नेण्यासाठी सासरच्या मंडळींनी जावयाला काठीने मारून जखमी केले. वड्डी (ता. मिरज) येथे शांताई गार्डनजवळ ही घटना घडली. याप्रकरणी अजय बाजीराव गडदे (वय २४, रा. सुभाषनगर, मिरज) यांनी ग्रामीण पोलिसांत फिर्याद दिली. त्यानुसार चुलत सासऱ्यासह चौघांवर मारहाणीचे गुन्हे दाखल झाले.
वायरमनचे काम करणारे अजय गडदे यांचा वड्डी येथील गौरी हिच्याशी विवाह झाला आहे. अजय यांच्या घराचे काम सुरू असल्याने त्यांनी तिला माहेरी सोडले होते. मात्र, तिला परत नेण्यासाठी सासरच्या मंडळींनी तगादा लावला होता. रविवारी (दि. २६) सायंकाळी अजय हे वडील, बहीण व भावजयीसह वड्डीला गेले होते. घराचे बांधकाम झाल्यावर पत्नीला घेऊन जातो, असे सांगत असताना चुलत सासरा दीपक सोनंदकर यांनी `गौरीला लगेच घेऊन जा`, असे सांगितले. त्यामुळे दोघांत बाचाबाची झाली.
त्यानंतर अजय घरी परतताना अमर सोनंदकर, प्रथम सोनंदकर, अनिल सोनंदकर, दीपक सोनंदकर यांनी अडवून काठीने मारहाण केली. भांडण सोडविण्यासाठी आलेले अजयचे वडील, बहीण व भावजयीलाही लाथाबुक्क्यांनी मारहाण केली. याप्रकरणी पोलिसांनी अमर, प्रथम, दीपक, अनिल (सर्व रा. वड्डी) यांच्याविरुद्ध गुन्हा दाखल केला आहे.