भिलवडी : सरकारी अनुदानावर अवलंबून राहून कोणताही धंदा किंवा व्यापार करायचा ठरविल्यास गाडी कधी पंक्चर होईल सांगता येणार नाही. सरकारवर अवलंबून न राहता विज्ञान - तंत्रज्ञानाचा वापर, कमीत कमी उत्पादन खर्च, जास्तीत जास्त उत्पादन व भविष्याचा वेध घेण्याची क्षमता ओळखून चितळे डेअरीने केलेली क्रांती कृषी व दुग्ध क्षेत्राला दिशा देणारी असल्याचे प्रतिपादन रस्ते वाहतूक आणि महामार्ग मंत्री नितीन गडकरी यांनी शुक्रवारी केले.भिलवडी स्टेशन (ता. पलूस) येथे चितळे डेअरी आणि जगातील सर्वांत मोठ्या जेनेटिक संस्थेच्या संयुक्त विद्यमाने, अत्याधुनिक तंत्रज्ञानाद्वारे उभारण्यात आलेल्या सेक्सेल सिमेन प्रयोगशाळेच्या उद्घाटनप्रसंगी ते बोलत होते. अध्यक्षस्थानी माजी केंद्रीय कृषिमंत्री खा. शरद पवार होते.गडकरी म्हणाले की, देशाचा आर्थिक विकास दर उंचावण्यासाठी शेती व दुग्ध व्यवसायामध्ये क्रांतिकारक बदल होणे आवश्यक आहे. सरकारकडून मिळणाऱ्या अनुदानावर अवलंबून राहून कोणताही धंदा किंवा व्यापार करायचा ठरविल्यास गाडी कधी पंक्चर होईल, हे सांगता येणार नाही. महिला सक्षमीकरणामुळे सांगलीसह पश्चिम महाराष्ट्रात विदर्भ - मराठवाड्यापेक्षा जादा कृषी - दुग्ध उत्पादन होत आहे. दूध वाढीसाठी देशभर दर्जेदार सिमेन उपलब्ध करून द्यावे लागेल. कमी खर्चात जादा प्रोटीन देणाऱ्या गवताची निर्मिती करावी लागेल. दुधाचे उत्पादन वाढले तरीही खर्च कमी कसा होईल, यादृष्टीने धोरणात्मक निर्णय घ्यावे लागतील.
या उपक्रमासाठी भविष्यात केंद्र सरकारकडून चितळे डेअरीस लागेल ती मदत दिली जाईल.खा. पवार म्हणाले की, महात्मा ज्योतिबा फुले यांनी शेतकऱ्यांची स्थिती सुधारण्यासाठी ब्रिटिशांकडे धोरणात्मक व क्रांतिकारी मागण्या केल्या होत्या. त्या वास्तवात आणण्याचे काम चितळे परिवाराने पूर्ण केले आहे. जी. एम. बियाण्यांचा वापर केल्यास देश अन्नधान्य उत्पादनात समृध्द बनेल. जी. एम. व्हरायटी न वापरण्याचा निर्णय न्यायालयाने घेतला आहे. त्याविरोधात केंद्र सरकारने पुन्हा न्यायालयात जावे.यावेळी नानासाहेब चितळे, विश्वास चितळे, श्रीपाद चितळे, अनंत चितळे, गिरीश चितळे, मकरंद चितळे, पालकमंत्री सुरेश खाडे, खा. संजय पाटील, आ. जयंत पाटील, आ. विश्वजित कदम, आ. सुधीर गाडगीळ, आ. मोहनराव कदम, आ. सुमनताई पाटील, आ. अनिल बाबर, आ. मानसिंगराव नाईक, आ. विक्रम सावंत, आ. अरुण लाड, पृथ्वीराज देशमुख आदी उपस्थित होते.
गडकरी, पवार एकाच गाडीतून
नितीन गडकरी, शरद पवार, जयंत पाटील, श्रीनिवास पाटील, विश्वजित कदम आदींनी इलेक्ट्रिक मोटारीत बसून सिमेन प्रयोगशाळेतील विविध विभागांची तसेच वळूंची पाहणी केली.