इस्लामपूर येथे शहर युवक राष्ट्रवादीच्या वतीने नगरपालिकेचे प्रभारी मुख्याधिकारी कैलास चव्हाण यांना निवेदन देण्यात आले. यावेळी सचिन कोळी, स्वरूप मोरे, सागर जाधव, अभिजित पाटील, शिवराज पाटील, अभिजित कुर्लेकर उपस्थित होते.
लोकमत न्यूज नेटवर्क
इस्लामपूर : इस्लामपूर शहरातील जनता डेंग्यू व चिकुन गुन्यासारख्या साथीने त्रस्त आहे. मात्र इस्लामपूर नगरपालिकेला याचे गांभीर्य नाही. नगरपालिकेने येत्या १०-१२ दिवसांत शहरात औषध फवारणी व योग्य त्या उपाययोजना कराव्यात अन्यथा ५ सप्टेंबरनंतर संपूर्ण शहरात औषध फवारणी करू, असा इशारा शहर युवक राष्ट्रवादीतर्फे देण्यात आला आहे. याबाबत प्रभारी मुख्याधिकारी कैलास चव्हाण यांना निवेदन देण्यात आले.
उपनगराध्यक्ष दादासाहेब पाटील, शहराध्यक्ष शहाजी पाटील, नगरसेवक खंडेराव जाधव, आनंदराव मलगुंडे, महिला शहराध्यक्षा रोझा किणीकर, युवक शहराध्यक्ष सचिन कोळी, कार्याध्यक्ष स्वरूप मोरे यांनी नेतृत्व केले.
युवक शहराध्यक्ष सचिन कोळी म्हणाले, शहरातील जनता साथीच्या आजारांनी त्रस्त आहे. नगरपालिकेने तातडीने औषध फवारणी करावी. अन्यथा आम्ही आंदोलन न करता युवा नेते प्रतीक पाटील यांच्या मार्गदर्शनाखाली शहरात औषध फवारणी करू. जलसंपदामंत्री जयंत पाटील यांच्याकडे शासकीय रुग्णालयात डेंग्यू तपासणीची प्रयोगशाळा मंजूर करण्यासाठी पाठपुरावा करीत आहोत.
दादासाहेब पाटील म्हणाले, नगराध्यक्षांच्या मनमानी कारभाराने शहराची अवस्था बिकट झाली आहे. युवक राष्ट्रवादीच्या कार्यकर्त्यांनी शहरातील विविध प्रश्नांवर आंदोलने करून सत्ताधाऱ्यांना जाग आणावी.
जाधव म्हणाले, युवक राष्ट्रवादी काँग्रेसच्या कार्यकर्त्यांनी शहरातील जनतेच्या जिव्हाळ्याच्या प्रश्नावर आवाज उठविला आहे. आज मोर्चास परवानगी न मिळाल्याने आपण निवेदन देत आहोत.
शहाजी पाटील म्हणाले, शहरातील नागरी सुविधांचा बोजवारा उठला आहे. सत्ताधाऱ्यांनी शहर १५ वर्षे मागे नेले आहे. स्वरूप मोरे, रोझा किणीकर, विशाल सूर्यवंशी, गोपाल नागे यांनी मनोगत व्यक्त केले.
यावेळी शिवराज पाटील, अभिजित पाटील, सागर जाधव, अभिजित कुर्लेकर, अभिजित रासकर, अभिजित भगवान पाटील, उदय कांबळे, संतोष ताटे, दादासाहेब सूर्यवंशी, अंकुश जाधव, नगरसेविका सुनीता सपकाळ, जयश्री पाटील, जयश्री माळी, शकील जमादार, मोहन भिंगार्डे, रणजित तेवरे, जुबेर खाटीक उपस्थित होते.