मोदी, फडणवीस यांच्यासह भाजप नेत्यांचे फोटो गायब

सांगली : महापालिकेच्या महापौर, उपमहापौर निवडीत भाजपचा पराभव झाल्यानंतर या दोघांच्या दालनातील पतंप्रधान नरेंद्र मोदी, माजी मुख्यमंत्री देवेंद्र फडणवीस, प्रदेशाध्यक्ष चंद्रकांत पाटील यांच्यासह आमदार, खासदार आणि कोअर कमिटीच्या नेत्यांचे फोटो गायब झाले. आता त्यांच्या जागी काँग्रेस व राष्ट्रवादीच्या नेत्यांचे फोटो लावण्याची घाईगडबड सुरू झाली आहे.

गेली अडीच वर्षे महापालिकेत भाजपची सत्ता होती. पहिल्यांदाच सत्ता मिळाल्याने महापौर,उपमहापौर, स्थायी सभापती, गटनेता या चारही कार्यालयात भाजप नेत्यांचे फोटो लावण्यात आले होते. त्यात पंतप्रधानांपासून राज्यातील नेत्यांचाही समावेश होता. तसेच स्थानिक आमदार सुधीर गाडगीळ, सुरेश खाडे, खासदार संजयकाका पाटील, कोअर कमिटीचे सदस्य दिनकर पाटील, दिलीप सूर्यवंशी, शेखर इनामदार यांच्या छायाचित्रांचा समावेश होता. बहुतांश कार्यालय हीच छायाचित्रे होती. पण मंगळवारी महापालिकेत सत्तांतर होताच महापौर व उपमहापौर कार्यालयातील ही छायाचित्रे गायब झाली होती. महापौर, उपमहापौरांनी पदभार हाती घेण्यापूर्वीच ती हटविण्यात आली होती. आता केवळ स्थायी सभापती व भाजप गटनेता या दोनच कार्यालय नेत्यांची छायाचित्रे असतील.

आता त्यांच्या जागी राष्ट्रवादीचे अध्यक्ष शरद पवार, उपमुख्यमंत्री अजित पवार, पालकमंत्री जयंत पाटील, कृषी राज्यमंत्री विश्वजित कदम, जयश्रीताई पाटील, विशाल पाटील, पृथ्वीराज पाटील यांची छायाचित्रे लावण्यात येणार असल्याचे सांगण्यात आले.