लोकमत न्यूज नेटवर्क
सांगली : सत्ताधारी भाजपमधील नाराजीचा फायदा उठवत राष्ट्रवादीचे प्रदेशाध्यक्ष तथा पालकमंत्री जयंत पाटील यांनी आता ‘मिशन महापालिका’ हाती घेतले आहे. फेब्रुवारीत होणाऱ्या महापौरपदाच्या निवडीसाठी फोडफोडीचा ‘कार्यक्रम’ आखला असून, त्यासंदर्भात नुकत्याच तीन गुप्त बैठका झाल्या आहेत. ‘संधी’ शोधणाऱ्या भाजपमधील नगरसेवकांना त्यांनी हेरले आहे.
जयंत पाटील यांनी २००८ मध्ये महाआघाडीचा प्रयोग करून काँग्रेसच्या मदन पाटील गटाची सत्ता उलथवून लावली होती. मात्र पाच वर्षांतच अंतर्गत लाथाळ्यांमुळे महाआघाडीला पायउतार व्हावे लागले होते. ‘इस्लामपूरचे पार्सल इस्लामपूरला परत!’ असे हिणवले गेले. राज्यातील सत्तेच्या जोरावर ऑगस्ट २०१८ मध्ये भाजपने काठावरचे बहुमत मिळवत महापालिकेत कमळ फुलवले. त्यावेळी सांगलीत परतण्याचा जयंतरावांचा डाव पुन्हा हुकला होता.
महापाैरपद पहिली अडीच वर्षे ओबीसी महिलेसाठी राखीव होते. पुढील अडीच वर्षे ते खुले आहे. त्यामुळे भाजपमधील इच्छुकांनी गुडघ्याला बाशिंग बांधले आहे. नेमकी हीच संधी साधून महापौर राष्ट्रवादीचा नव्हे, तर काँग्रेस किंवा भाजपचा करायचा, पण ‘आपले ऐकण्यातला’ असावा, यासाठी जयंतरावांचे डावपेच सुरू झाले आहेत. त्यासंदर्भात तीन गुप्त बैठका झाल्या आहेत.
राज्यात महाआघाडीचे सरकार असल्याने काँग्रेसचे सर्व गट जयंतरावांसोबत येतील, यासाठी जाळे टाकण्यात येत आहे. शिवाय सरकारी निधीचे गाजर आणि भविष्यातील समीकरणांची वाट दाखवून भाजपमधील नाराजांना वळवण्याची रणनीतीही आखली जात आहे. त्याद्वारे कुंपणावरील नगरसेवक फुटतील असा होरा बांधण्यात आला आहे.
महापाैरपदासाठी मदन पाटील गटाचे नाव पुढे करून लढत द्यायची किंवा भाजपमधील नाराजांना हाताशी धरून तत्कालीन महाआघाडीतील आपल्या गटाचा महापौर करून सत्तेचा सुकाणू हातात ठेवायचा, अशी खेळी खेळण्याचे नियोजन सुरू आहे.
-------------
बावडेकर, आवटी, सूर्यवंशी की संतोष पाटील?
भाजपमधून युवराज बावडेकर, निरंजन आवटी, धीरज सूर्यवंशी प्रबळ दावेदार आहेत. या तिघांचेही गट महाआघाडीसोबत होते. अंतर्गत संघर्षातून महापौरपदासाठी ते कोणाशीही हातमिळवणी करू शकतात किंवा तिन्ही गटांमध्ये साठमारी होऊ शकते. आवटी किंवा सूर्यवंशी यांच्याशी बोलणी फिसकटली तर बावडेकर हाताशी लागू शकतात. त्यांना खासदार संजयकाका पाटील यांचे पाठबळ असल्याने ‘करेक्ट कार्यक्रम’ होऊ शकतो, याचा अंदाज जयंतरावांना आहे. पक्षादेशाच्या अडसर आला तर काहींना अनुपस्थित ठेवून काँग्रेसमधील मदन पाटील गटाच्या संतोष पाटील यांचे नाव पुढे केले जाईल. हल्ली संतोष पाटील यांची जयंतरावांशी जवळीक वाढली आहेच!