मिरजेत ५४ मंडळांच्या गणेशाचे विसर्जन, घरगुती गणेशमूर्तींच्या विसर्जनासाठी गणेश तलाव व कृष्णाघाटावर गर्दी 

मिरज : मिरजेत सातव्या दिवशी शहरातील ५४ सार्वजनिक मंडळांच्या गणेशमूर्तींचे जल्लोषात व सवाद्य मिरवणुकांतून गणेश तलावात विसर्जन करण्यात आले. घरगुती गणेशमूर्तींच्या विसर्जनासाठी गणेश तलाव व कृष्णाघाटावर गर्दी होती.सुमारे चारशे सार्वजनिक मंडळांपैकी अनेक मंडळांनी मंगळवारी दुपारपासूनच मिरवणुकीस सुरुवात केली. पारंपरिक पद्धतीने काढलेल्या मिरवणुकांमध्ये डीजे, ढोल-ताशांचा गजर, टाळ-मृदंगाचा निनाद व मोरयाच्या जयघोषात बाप्पाला निरोप देण्यात आला. विसर्जन सोहळा सुरळीत पार पडावा, यासाठी पोलिस उपाधीक्षक प्रणील गिल्डा व शहर पोलिस निरीक्षक यांच्या मार्गदर्शनाखाली मिरवणूक मार्गावर पोलिस बंदोबस्त ठेवण्यात आला होता. भोई समाज मंडळाच्या कार्यकर्त्यांनी तलावात मूर्तींचे विसर्जन केले. भक्तिमय वातावरणात बाप्पाला निरोप देत विसर्जन सोहळा संपन्न झाला.