उपमहापौर, भाजप अशांत; मदनभाऊ गट मात्र शांत

सांगली : महापालिकेच्या अर्थसंकल्पातील निधीवरून उपमहापौर उमेश पाटील, भाजपच्या पदाधिकाऱ्यांनी महापौर दिग्विजय सूर्यवंशींसह राष्ट्रवादी काँग्रेसला खिंडीत गाठले आहे. पण या वादात काँग्रेसमधील मदनभाऊ गट मात्र शांतच आहे. चौमाही बजेटमध्ये वाढीव तरतुदीचे गाजर महापौरांनी दाखविले आहे. तोपर्यंत उपमहापौर वाट पाहणार का? असा प्रश्न आहे.

महापालिकेच्या अर्थसंकल्पात काँग्रेस व राष्ट्रवादीच्या नगरसेवकांना वाढीव ४० लाखांचा स्थानिक निधी देण्यात आला. तर भाजप नगरसेवकांसाठी केवळ २५ लाखांची तरतूद करण्यात आली. यावरून भाजपने आक्रमक पवित्रा घेतला. महासभा चालू न देण्याचा इशाराही भाजपकडून देण्यात आला. त्यावर सत्ताधारी राष्ट्रवादीने शंभर कोटींच्या निधीवाटपाचा मुद्दा उपस्थित करीत भाजपवर पलटवार केला. राष्ट्रवादी विरुद्ध भाजप असा सामना रंगलेला असतानाच उपमहापौर पाटील यांनी या वादात उडी घेतली. वसंतदादा स्मारक स्थळाच्या विकासासाठी त्यांनी एक कोटीची मागणी केली होती. पण महापौरांनी केवळ १० लाखांची तरतूद करून त्यांच्या पत्राला वाटाण्याच्या अक्षता लावल्या. राष्ट्रवादीकडून उपमहापौरांची समजूत काढण्याचा जोरदार प्रयत्नही झाला.

महापौर सूर्यवंशी यांनी चौमाही बजेटमध्ये वसंतदादा स्मारकासाठी वाढीव निधीची तरतूद करण्याचे आश्वासन दिले. पण हे आश्वासन केवळ गाजर ठरणार आहे. चौमाही बजेटला अजून दोन महिन्यांचा कालावधी आहे. तोपर्यंत वसंतदादा स्मारकस्थळाच्या विकासासाठी वाट पाहावी लागणार आहे. जानेवारी महिन्यात निविदा काढून त्यानंतर काम सुरू होण्यास फेब्रुवारी महिना उजाडेल. आताच अर्थसंकल्पात तरतूद झाली असती तर निविदा काढून तातडीने काम सुरू झाले असते. त्यातच आयुक्तांनी अर्थसंकल्पातील ठराविक कामेच मार्गी लागतील, असे स्पष्ट संकेत दिले आहेत. त्यामुळे नगरसेवकांचा वाढीव निधी अथवा इतर कामांच्या पूर्ततेबाबत साशंकताच आहे.

या साऱ्या वादात काँग्रेसंतर्गत मदनभाऊ गट मात्र शांतच दिसत आहे. विरोधी पक्षनेते उत्तम साखळकर यांनी अर्थसंकल्पातील तरतुदीबाबत जाहीर वाच्यता केलेली नाही. मदनभाऊ एकांकिका स्पर्धेच्या निधीतही कपात करण्यात आली आहे. पण त्यावर या गटाकडून कोणतेच भाष्य करण्यात आलेले नाही. उपमहापौर पाटील यांच्या भूमिकेला आमचा पाठिंबा असल्याचे लंगडे समर्थन केले जात आहे.

चौकट

आम्ही उपमहापौरासोबत : साखळकर

याबाबत विरोधी पक्षनेते उत्तम साखळकर म्हणाले की, वसंतदादा स्मारकाच्या विकासासाठी उपमहापौरांसह मीही महापौरांना पत्र दिले होते. हा उपमहापौरांनी हाती घेतला. त्याला आमचा पाठिंबा आहे. आमच्याकडील पत्राच्या प्रतिही उपमहापौरांना दिल्या आहेत. वसंतदादा स्मारकाबाबत आम्ही उपमहापौरासोबत आहोत, असे सांगितले.