सांगली : गौरींचे आगमन आता दोन दिवसांवर आले आहे. गणपतीबरोबरच गौरी मुखवटे तयार करण्याची लगबग आता संपली आहे. सांगलीतील मुर्तीकार अरविंद तोगरे यांनी तयार केलेल्या गौरीच्या मुखवट्यांना परदेशातील भारतीय नागरिकांकडून मागणी आहे. त्यामुळे मागणीनुसार सांगलीतील गौरींचे मुखवटे अमेरिका, इंग्लंड, नेपाळसह विविध देशात पाठविले आहेत. तसेच, महाराष्ट्रातील विविध जिल्ह्यांसह कर्नाटक, आंध्र प्रदेश, पंजाब, राजस्थान, गुजरातमधून अजूनही गौरीचे मुखवट्यांना मागणी आहे.सांगतलीच्या अरविंद तोगरे यांच्या ओम आर्टस कार्यशाळेतही हे गौरीचे मुखवटे व मुकुट तयार केले जातात. गौरी मुखवट्यांचे काम परदेशात मागणी असल्याने वर्षभर सुरू असते. अरविंद तोगरे हे स्वतः एम आणि जीडी आर्ट आहेत. त्यांचे वडील विजयकुमार तोगरे आणि सासरे विट्याचे दत्तात्रय बीडकर गणपती मूर्ती आणि गौरी मुखवटे तयार करायचे. त्यामुळे गेली पन्नास वर्षं गौरी मुखवट्यांचा हा पारंपारिक व्यवसाय सुरू आहे.
असे बनवितात मुखवटे..अगोदर साचा निर्मिती, मुखवटा घडवणे, फिनिशिंग, रंगकाम, दागदागिन्यांची कलाकुसर, डोळे, भुवया, नाक, ओठ यांचे नाजूक काम अशा अनेक टप्प्यांमधून हे मुखवटे आकाराला येतात. सजीव डोळे, धारदार नाक, नाजूक जिवणी आणि सुबक ठेवण हे या मुखवट्यांचं वैशिष्ट्ये आहेत. गौरीचे शाडूचे मुखवटे नाजूक असतात. त्यामुळे ते हळूवारपणे हताळावे लागते. त्यामुळे प्लॅस्टर ऑफ पॅरीसचे गौरी मुखवटे तयार केले जातात. एका गौरी मुखवटयाचं वजन १०० ग्रॅमच्या आसपास असतं. हे गौरी मुखवटे दरवर्षी विसर्जित केले जात नाहीत. त्यामुळे पर्यावरणाला फारशी हानी होत नाही.
मुखवटे सातासमुद्रपार पोहोचले..मुंबई, पुणे, नाशिक, औरंगाबाद, उस्मानाबाद. परळी वैजनाथ आणि पंढरपूर अशा भागांतून तोगरे यांच्या गौरी मुखवटयांना मोठी मागणी आहे. या ओम आर्टसचे हे मुखवटे अगदी सातासमुद्रापारही पोहोचलेत. दागदागिने आणि आकार यांच्यात विविधता असलेले ८ ते ९ प्रकारचे गौरी मुखवटे इथे पाहायला मिळतात. त्यावरुनच त्यांचा दर ठरतो. आता पहिल्या टप्प्यात साधारणपणे दोन हजार गौरींचे मुखवटे तयार होऊन रवाना झालेत. तर दुस-या टप्प्यातल्या गौरींच्या मुखवट्याचं ऑस्ट्रेलिया इंग्लंड अमेरिका या राज्यांमध्ये पोहोच झाले आहेत, अशी माहिती अरविंद तोगरे यांनी दिली.