वारणावती : चांदोली राष्ट्रीय उद्यान व धरण दि. ३० डिसेंबर दि. ते १ जानेवारी अखेर ३१ डिसेंबरच्या पार्श्वभूमीवर तीन दिवस पर्यटनासाठी बंद असणार आहे, अशी माहिती चांदोली अभयारण्याचे वनक्षेत्रपाल नंदकुमार नलवडे व धरण प्रशासनाचे शाखा अभियंता गोरख पाटील यानी दिली.शिराळा तालुक्याच्या पश्चिम विभागातील चांदोली धरण व चांदोली राष्ट्रीय उद्यान पर्यटकांसाठी पर्वणीच ठरत आहे. सध्या मोठ्या प्रमाणात पर्यटन सुरू आहे. पण सरत्या वर्षाला निरोप देऊन नववर्षाचे स्वागत करताना अभयारण्य व धरण परिसरात काही हौसी, नवसे पार्ट्या करतात, दंगामस्ती करतात.
याचा व अन्य पर्यटकांकडून होणारा उपद्रव लक्षात घेऊन सह्याद्री व्याघ्र प्रकल्पातील चांदोली राष्ट्रीय उद्यान व धरण पाहण्यासाठी दि. ३० डिसेंबर ते दि. १ जानेवारीअखेर तीन दिवस बंदी घालण्यात आली आहे. या तीन दिवसांच्या पर्यटन बंदीनंतर दोन जानेवारीपासून पुन्हा नेहमीप्रमाणेच पर्यटन सुरूच राहणार आहे.