अविनाश कोळी, लोकमत न्यूज नेटवर्क
सांगली : भाजपचे नेते आशिष शेलार यांच्या पोटात छत्रपती शिवाजी महाराजांबाबतचा लपलेला द्वेष ओठातून बाहेर आला आहे, अशी टीका शिवसेनेचे जिल्हा संघटक दिगंबर जाधव यांनी केली. छत्रपतींची तुलना त्यांनी सावरकरांबरोबर केल्याने सांगली जिल्हा शिवसेनेच्यावतीने त्यांचा निषेध करीत असल्याचे त्यांनी सांगितले.
जाधव यांनी काढलेल्या पत्रकात म्हटले आहे की, सावरकर निश्चितपणे मोठे असतील; परंतु तमाम हिंदुस्तानचे दैवत हिंदवी स्वराज्य संस्थापक छत्रपती शिवाजी महाराजांच्या बुद्धिचातुर्य व शौर्याची तुलना सावरकरांसोबत करून शेलारांनी भारतीयांचा अपमान केला आहे. त्यांनी तमाम जनतेची तत्काळ जाहीरपणे माफी मागावी. शेलारांच्या या बेताल वक्तव्याबाबत सांगली जिल्हा शिवसेनेच्यावतीने त्यांचा जाहीर निषेध करीत आहोत.
सवंग लोकप्रियतेसाठी सतत बेतालपणे वक्तव्य करणाऱ्या व सत्तेची हवा डोक्यात गेलेल्या भाजपच्या नेत्यांनी आपली थोबाडे बंद करावीत, अन्यथा एक दिवस महाराष्ट्राची जनताच त्यांची थोबाडे बंद करतील. शेलार व अनेक भाजप नेत्यांच्या पोटात शिवरायांबद्दल द्वेष भावना आहे. यापूर्वी भाजपच्या एका नेत्याची शिवरायांबद्दलच्या द्वेषभावनेची ध्वनिफीत व्हायरल झाली होती. त्यामुळे हा द्वेष त्यांच्यात पूर्वीपासून भरला आहे. त्यामुळे त्यांना जनताच धडा शिकवेल, असे जाधव म्हणाले.
शेलारांना काळे फासू
आशिष शेलार यांनी तातडीने माफी न मागितल्यास सांगली जिल्ह्यात आल्यावर त्यांच्या तोंडाला काळे फासल्याशिवाय शिवसैनिक व जनता शांत बसणार नाही, असा इशाराही जाधव यांनी दिला आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"