आशा, गटप्रवर्तकांची जिल्हा परिषदेसमोर निदर्शने

लोकमत न्यूज नेटवर्क

सांगली : कोरोनात काम करणाऱ्या कर्मचाऱ्यांना किमान वेतन २१ हजार रुपये द्यावेत, आशा व गटप्रवर्तकांचे पाच महिन्यांचे थकीत मानधन त्वरित मिळावे, यासह अन्य मागण्यांसाठी जिल्ह्यातील आशा, गटप्रवर्तक महिलांनी शुक्रवारी जिल्हा परिषदेसमोर निदर्शने केली. तसेच शासनाने मागण्याकडे दुर्लक्ष केल्यास आम्ही बेमुदत काम बंद आंदोलन करू, असा इशाराही त्यांनी दिला आहे.

आशा, गतप्रवर्तक व आरोग्य कर्मचारी संघटनेतर्फे मागण्यांचे निवेदन प्रभारी जिल्हा आरोग्य अधिकारी डॉ. मिलिंद पोरे यांना दिले. या आंदोलनात सुमन पुजारी, विद्या पाटील, इंदुताई यलमर, विद्या कांबळे, चांदणी साळुंखे, उज्ज्वला गुरव, सुनीता कुंभार, सोनम कोळी, वनिता हिप्परकर, ज्योतीताई निचळ, मोनिका अर्जुन, सविता देवकर, सविता पाटील, सीमा टोमके, नदिरा काझी, मनीषा कदम, सुवर्णा निकम आदी सहभागी झाले होते.

निवेदनात म्हटले की, तातडीने पाच महिन्यांचे थकीत मानधन त्वरित मिळाला पाहिजे, आरोग्य वर्धिनीची रक्कमही अद्याप मिळाली नाही, तीही लवकर मिळावी, कोरोनाचे काम करणाऱ्या कर्मचाऱ्यांना किमान वेतन २१ हजार रुपये मिळाले पाहिजे, यासह विविध मागण्यासाठी आशा, गटप्रवर्तक महिलांनी जिल्हा परिषदेवर मोर्चात काढून निदर्शने केली.