खेडचे नगराध्यक्ष वैभव खेडेकर यांच्या हस्ते संगमेश्वर तालुक्याला मानाचा फिरता चषक प्रदान केला.
लोकमत न्यूज नेटवर्क
देवरुख : खेड येथे जिल्हास्तरीय ओपन चॅलेंज तायक्वाॅंदो स्पर्धा २०२१ आयाेजित करण्यात आली हाेती. ही स्पर्धा स्पेशल, सब ज्युनिअर, कॅडेट, ज्युनिअर व सीनिअर अशा पाच वयोगटांमध्ये विभागलेली होती. या स्पर्धेत संगमेश्वर तालुक्याने पदकांची लयलूट करत मानाचा फिरता चषक पटकावला.
नगरपरिषदेचे नगराध्यक्ष वैभव खेडेकर, तायक्वाॅंदो जिल्हा संघटना अध्यक्ष व्यंकठेश कररा, जिल्हा प्रमुख प्रशिक्षक लक्ष्मण कररा, जिल्हा संघटना खजिनदार शशांक घडशी, जिल्हा संघटना उपाध्यक्ष विठ्ठलदास लोखंडे, पंच प्रमुख भरत करर्रा, खेड तालुक्याचे कुणाल चव्हाण, प्रशांत कांबळे व अजय निंगडेकर यांच्या आयोजनाखाली पार पडली.
या जिल्हा स्पर्धेसाठी जिल्हाभरातून सुमारे ४०० खेळाडूंनी सहभाग नोंदविला होता. त्यामध्ये नगरपंचायत देवरुख तायक्वाँदो क्लब, पी. एस. बने तायक्वाँदो क्लब, साडवली, दादासाहेब सरफरे विद्यालय तायक्वाँदो क्लब, बुरंबी, तायक्वाँदो क्लब साखरपा, लायन्स तायक्वाँदो क्लब, संगमेश्वर आणि तायक्वाँदो क्लब निवे च्या ७५ खेळाडूंचा समावेश होता. या स्पर्धेमध्ये संगमेश्वर तालुक्याने फाईट व पुमसेमध्ये ३६ सुवर्ण, ३० रौप्य व १९ कांस्यपदके पटकावत पदकांची लयलूट करत, पुमसेमध्ये प्रथम क्रमांक, फाईटमध्ये द्वितीय क्रमांक पटकावत मानाचा समजला जाणारा फिरता चषक सलग तीन वेळा पटकावून स्पर्धेवर वर्चस्व गाजवले.