रत्नागिरी : मराठी साहित्यामध्ये चैतन्य यावे, साहित्य चळवळ वृद्धिंगत व्हावी आणि कोकणातून नवे साहित्यिक घडावे या उद्देशाने रत्नागिरीतील जनसेवा ग्रंथालयातर्फे ‘साहित्यिक गुढी’ सोमवार, दि. ८ एप्रिल रोजी उभारण्यात येणार आहे. साहित्याची गुढी उभारून कोकणच्या संस्कृतीचे खास वैशिष्ट्य असलेले संगमेश्वरी बोलीभाषेतील गाऱ्हाणे यावेळी घालण्यात येणार आहे.
नव्याची सुरूवात आणि नव्याची निर्मिती असा गुढीपाडवा या सणाचा अर्थ आहे. त्याअनुषंगाने मराठी साहित्य विश्वात नव्याची निर्मिती व्हावी अर्थात वाचन आणि साहित्य चळवळ वृद्धिंगत व्हावी, यासाठी नेहमीच कटीबद्ध असलेल्या जनसेवा ग्रंथालयातर्फे ही साहित्यिक गुढी उभारण्यात येणार आहे. साहित्य विश्वातील हा एकमेव आणि आगळा-वेगळा असा उपक्रम आहे.
यावेळी पुस्तकांची माळ असलेली साहित्यिक गुढी उभारण्यात येणार आहे. त्यानंतर गुढीपूजा व ग्रंथपूजा होईल. गुढीपूजा झाल्यानंतर कोकणातील साहित्य चळवळीला उर्जितावस्था लाभावी, नवनवे साहित्यिक निर्माण होऊन सकस साहित्य निर्मिती व्हावी, या उद्देशाने संगमेश्वरी बोलीभाषेतील लेखक अमोल पालये हे गाऱ्हाणे घालणार आहेत. त्यानंतर मराठी साहित्याचा पाया रचणाऱ्या संत साहित्याच्या ग्रंथ प्रदर्शनाचे उद्घाटन करण्यात येणार आहे.
गुढीपाडव्याच्या पूर्वसंध्येला म्हणजेच सोमवार, दि. ८ एप्रिल रोजी सकाळी १० वाजता जनसेवा ग्रंथालयाच्या प्रांगणात ही साहित्यिक गुढी उभारण्यात येणार आहे. कार्यक्रमाच्या सुरूवातीला गुढीचे खास आकर्षण असलेल्या ‘साहित्य पताका’ लावण्यात येतील. जनसेवाचे वाचक श्रीनिवास सरपोतदार यांच्या संकल्पनेतून दरवर्षी विविध विषयांवर साहित्य पताका तयार केल्या जातात.