मधुकर ठाकूर -
उरण : जेएनपीएने नव्याने उभारलेल्या ३१४ खर्चाच्या ॲडिशनल लिक्वीड कार्गो जेट्टी सर्वाधिक बोली लावलेल्या व यशस्वी ठरलेल्या जेएसडब्ल्यू इन्फ्रा स्ट्रक्चरल लिमिटेड कंपनीला पीपीपी तत्वावर देण्याच्या करारावर सोमवारी जेएनपीए अध्यक्ष उन्मेष वाघ यांनी स्वाक्षऱ्या केल्या.
जेएनपीएची बंदरात ३०० मीटर लांबीच्या सध्याच्या एसबी -०२ व एसबी- ०३ या दोन्ही बर्थ बीपीसीएल, इंडियन ऑईल कार्पोरेशन लिमिटेड कंपनीला चालविण्यासाठी देण्यात आलेल्या होत्या. या जुन्या जेट्टीच्या दोन्ही बाजूला बर्थिंगची सोय असल्याने दोन्ही बर्थवर पीओएल, एलपीजी,ईडीबल ऑईल,मोलॅशिस आणि इतर अनेक प्रकारच्या केमिकल जहाजांची वाहतूक केली जात आहे. वाढत्या तरल पदार्थांच्या हाताळणीसाठी सध्याचे लिक्विड बल्क टर्मिनल अपुरे पडत असल्याने जहाजांसाठी प्रतिक्षा करावी लागते. त्यामुळे आयात व्यापाऱ्यांना नाहक अतिरिक्त वेळ, पैसा खर्च करावा लागतो.त्यामुळे आर्थिक नुकसान होते. जुन्या जेटीच्या दोन्ही बाजूला २५००० ते ७०००० डीडब्ल्युटी ( डेडवेट टनेज) क्षमतेपर्यतची जहाजे एकाच वेळी हाताळण्याची सुविधा या जेट्टीला लागुन असलेल्या दुहेरी बर्थमध्ये आहे.जुन्या केमिकल जेट्टीची क्षमता ६.५ मिलियन टन (एमटीपीए) इतकी आहे.
लिक्वीड कार्गो जेट्टीला जोडूनच अतिरिक्त आणखी जेट्टी ४६५ मीटर पर्यंत वाढवण्यात आली आहे.त्यामुळे ॲडिशनल लिक्वीड कार्गो जेट्टीमुळे केमिकल वाहतुकीची क्षमता आणखी ४.५ मेट्रिक टनांपर्यंत म्हणजेच ११ मिलियन टनांपर्यंत (एमटीपीए) म्हणजे दुपटीने वाढली आहे.त्यासाठी ३१४ कोटी रुपये खर्चही करण्यात आले आहेत.ही ॲडिशनल लिक्वीड कार्गो जेट्टी पीपीपी तत्वावर चालविण्यासाठी जेएनपीएने निविदा काढल्या होत्या. या निविदा प्रक्रियेत सात कंपन्या सहभागी झाल्या होत्या.यामध्ये अव्वल बोलीदार म्हणून जेसडब्यू या कंपनीची निवड करण्यात आली आहे. या कंपनीने प्रति मेट्रिक टनासाठी २५२ रुपये रॉयल्टीची देण्याची ऑफर केली आहे.
यशस्वी ठरलेल्या जेएसडब्ल्यू इन्फ्रा स्ट्रक्चरल लिमिटेड कंपनीला पीपीपी तत्वावर हस्तांतरित करण्याच्या करारावर सोमवारी जेएनपीए अध्यक्ष उन्मेष वाघ यांच्या हस्ते स्वाक्षऱ्या करण्यात आल्या. “ लिक्विड कार्गो हँडलिंग क्षमतेचा विस्तार करण्याची वाढती मागणी पूर्ण करण्यासाठी आणि बंदराची कार्यक्षमता वाढविण्यासाठी हे एक धोरणात्मक पाऊल आहे. नाविन्यपूर्ण भागीदारी आणि गुंतवणुकीद्वारे, आम्ही उत्कृष्ट सेवा देण्यासाठी आणि या प्रदेशात आर्थिक विकासाला चालना देण्यासाठी सज्ज असल्याचे जनेपीएचे अध्यक्ष उन्मेष वाघ यांनी यावेळी सांगितले.