नेरळ : माथेरान घाटात दोन फूट असणाऱ्या सुरक्षा कठड्यावर एक जीप हवेत तरंगत असतांनाचे थरारक चित्र समोर आले आहे. माथेरान घाटातील वॉटर पाईप स्टेशनच्या वरच्या अवघड चढणीला हा अपघात झाला आहे. या गाडीत नऊ प्रवासी प्रवास करत असल्याची माहिती समोर आली आहे. दैव बलवत्तर म्हणून मोठी दुर्घटना टळली.
एमएच ०३-६६६६ महाराष्ट्र पासिंग असलेली ही जिप्सी जीप घेऊन पर्यटक मुंबईहून माथेरान फिरण्यासाठी नेरळ येथे आले होते. या वाहनासोबत आणखी काही वाहने सोबत असल्याचे समजते. नेरळ येथून माथेरानचा अवघड घाट चढण्यासाठी वाहनचालक वेगामध्ये असल्याचे समोर आले आहे. माथेरान मिनी ट्रेनच्या वॉटरपाईप स्टेशनच्या वरच्या अवघड चढणीला, वाहन चालकाचा वाहनावरील ताबा सुटल्याने, वाहन खोल दरीच्या बाजूला असलेली लोखंडी ग्रील तोडून सिमेंट क्राँक्रिटच्या दोन फूट उंच सुरक्षा कठड्यावर चढून कार हवेत तरंगत बंद पडली होती. हे चित्र एवढे भयानक होते की एखाद्या चित्रपटाचे दृश्य वाटावे. सुदैवाने दैव बलवत्तर म्हणून मोठी दुर्घटना टळली आहे. या कुटुंबावर काळ आला होता पण वेळ आली नव्हती असेच काही म्हणायला हरकत नाही.