राजेश भोस्तेकर, लोकमत न्यूज नेटवर्क, अलिबाग: अलिबाग वडखळ मार्गावर कार्लेखिंड येथे आयवा ट्रक वाहनाला अपघात झाला आहे. या अपघातामुळे वाहनातील खडी रस्त्यावर पसरली असून ऑईल रस्त्यावर पसरले आहे. त्यामुळे वडखळ कडे जाणारी वाहतूक पर्यायी मार्गाने वळविण्यात आली आहे. घटनास्थळी वाहतूक पोलीस रस्ता सुरळीत करीत आहेत. मात्र या अपघातामुळे काही काळ वाहतूक विस्कळीत झाली होती.
अलिबाग वडखळ मार्गावरून खडी घेऊन टाटा कंपनीचा आयवा ट्रक (एम एच ०६/बी डबल्यू ७९९२ ) हा अलिबाग कडे येत होता. कार्ले खिंड चढताना ट्रकला अपघात होऊन रस्त्याच्या कडेला पलटी झाला. त्यामुळे वाहनातील खडी रस्त्यावर पसरली. वाहन पलटी झाल्याने वाहनातील ऑईल रस्त्यावर पसरले आहे. त्यामुळे इतर वाहनांना अपघाताची शक्यता असल्याने वाहतूक पर्यायी मार्गाने वळवली होती. अलिबाग येथून रेवस मार्गावरून कनकेश्वर फाटा द्वारे कार्ले खिंड अशी वाहतूक वळविण्यात आली होती.
अपघातानंतर वाहतूक पोलीस घटनास्थळी दाखल झाले. रस्त्यावर पडलेली खडी स्थानिकांच्या मदतीने बाजूला करून ऑईल वर माती टाकून रस्त्या वाहतुकीस सुरळीत केला. मात्र या अपघातामुळे काही काळ अलिबाग वडखळ रस्त्यावरील विस्कळीत झाली होती.