तळेघरर : श्री क्षेत्र भीमाशंकर अभयारण्यातील प्रसिद्ध अशा कोंढवळ येथील धबधब्यात पाय घसरल्याने पडून एक तरुण पडून बेपत्ता झाल्याची घटना गुरुवारी घडली. ग्रामस्थ व पोलीस प्रशासन त्याचा शोध घेत आहे, मात्र अंधार पडल्याने बचाव कार्य थांबवण्यात आले.
लक्ष्मण सोन्याबापू लहारे (वय २९, मूळ गाव राहता, जि. अहमदनगर) असे धबधब्यात पडून बेपत्ता झालेल्या तरुणाचे नाव आहे. तो शिक्रापूर येथील एका कंपनीत कामाला असून तो वर्षाविहारासाठी भीमाशंकर येथील कोंढवळ धबधबास्थळी आला होता. धबधब्याच्या ओढ्याला असलेल्या प्रचंड पाण्यामुळे लक्ष्मण हा वाहून गेला असून त्याचा तपास लागू शकला नाही, बाराज्योतिर्लिंगांपैकी एक असणारे श्री क्षेत्र भीमाशंकर व परिसर हा अभयारण्यात आहे. सध्या या ठिकाणी पाऊस सुरू असून निसर्ग सौंदर्य बहरले आहे. पावसामुळे येथील अनेक लहान-मोठे धबधबे सुरू झाले आहेत. या निसर्गाचा आस्वाद घेण्यासाठी अनेक पर्यटक येथे येत असतात. यामध्ये कोंढवळ धबधबा हा नेहमीच पर्यटकांचे आकर्षण ठरला आहे. गुरुवारी सकाळी सहा वाजता शिक्रापूर येथून निघालेले लक्ष्मण सोन्याबापू लहारे, अजय भरत कहाणे (वय २९, रा. शिक्रापूर), रवी अशोक कदरमंडलगी (वय ३५,रा. लोणी कंद), आनंद मारुती मोहिते (वय ४५), ओमकार आनंद मोहिते (वय १३), अंकिता आनंद मोहिते (वय १५, रा. शिक्रापूर) हे मोटारीने भीमाशंकर येथे आले. मात्र, मंदिर बंद असल्यामुळे ते दर्शनासाठी जाऊ शकले नाही. म्हणून हे सर्व वर्षाविहारासाठी भीमाशंकरजवळील कोंढवळ येथील धबधब्याकडे गेले. सकाळी ९.३० च्या सुमारास येथील मुख्य धबधब्या जवळील पाण्याजवळ लक्ष्मण सोन्याबापू लहारे गेले असता पाय घसरून पाण्यात पडला. पाण्याचा प्रवाह मोठ्या प्रमाणात असल्यामुळे धबधब्याच्या खाली असलेल्या कुंडामध्ये हा जाऊन पडला. त्यानंतर त्याचा तपास लागला नाही. पोलीस पाटील सुभाष कारोटे यांनी दूरध्वनी वरून घोडेगाव पोलीस ठाण्यात या घटनेची माहिती दिली. घोडेगाव पोलीस ठाण्याचे सहायक पोलीस निरीक्षक एल.जी. थाटे, सहायक फौजदार जे. आर. वाजे, पोलीस नाईक दीपक काशिद, पोलीस कर्मचारी जालिंदर रहाणे, यांनी घटनास्थळी भेट देऊन तपास सुरू केला. प्रशासनासोबत कोंढवळ गावचे सरपंच दीपक चिमटे, पोलीस पाटील सुभाष कारोटे व ग्रामस्थांनी शोध घेतला. परंतु बराच उशिरापर्यंत यश आले नाही.
कोट
सदर तरुणाला शोधण्यासाठी एन.डी.आर.एफ.ची टीम बोलवण्यासाठी प्रयत्न केले जाणार आहेत.
एल. जी. थाटे,
सहायक पोलीस निरीक्षक, घोडेगाव.
चौकट
या कोंढवळ धबधब्याच्या ठिकाणी २०१५ रोजी मंचर येथील एस. काॅर्नर येथील खानदेशी हा तरुण पडून मृत्युमुखी पडला होता. तोसुद्धा असाच लवकर न सापडल्यामुळे एन.डी.आर.एफ.ची टीम बोलविण्यात आली होती. त्यानंतर ह्या कोंढवळ धबधब्यावर जाण्यासाठी बंदी केली होती. वनविभागाने या ठिकाणी जाणारे रस्ते बंद केले होते. परंतु बाहेरुन आलेले पर्यटक आपला जीव धोक्यात घालून येथे जातात. पर्यटकांनी जीव धोक्यात घालून येथे येऊ नये, असे प्रशासनाच्या वतीने सांगण्यात येत आहे.
फोटो : कोंढवळ येथील धबधब्यावरील कुंडात पडलेल्या तरुणाचा शोध घेताना ग्रामस्थ व पोलीस प्रशासन.