किरण शिंदे
पुणे - वैष्णवी हगवणे मृत्यू प्रकरणातील आरोपी निलेश चव्हाण याचा शस्त्र परवाना सध्या वादात सापडला आहे. गुन्हेगारी पार्श्वभूमी असतानाही निलेश चव्हाणला शस्त्र परवाना मिळालाच कसा असा प्रश्न उपस्थित केला जातोय. गुन्हेगारी पार्श्वभूमीच्या या निलेश चव्हाणला शस्त्र परवाना मिळवून देण्यासाठी पोलीस दलातूनच मदत झाली असल्याची कुजबूज सध्या सुरू आहे. त्यामुळे पुणे पोलिसांच्या कारभाराकडे सध्या संशयाने पाहिले जात आहे. असे असतानाच पुणे पोलिसांकडून आता एक महत्त्वाची माहिती समोर आली आहे.
पुणे पोलिसांनी मागील काही दिवसात तब्बल १४० पिस्तुलांचे परवाने रद्द केल्याचे समोर आले आहे. पिस्तुलाचा परवाना असलेल्या यातील काही व्यक्तीविरोधात गुन्हे दाखल आहेत तर काहींनी नूतनीकरण न केल्यामुळे हे परवाने रद्द करण्यात आलेत. राज्याचे सांस्कृतिक राजधानी आणि विद्येचे माहेरघर अशी खरंतर पुणे शहराची ओळख आहे. कधीकाळी राहण्यासाठी सर्वाधिक सुरक्षित शहर म्हणूनही पुण्याची ओळख आहे. मात्र आता येथील नागरिकही स्वतःच्या सुरक्षिततेसाठी सतर्क झाले आहेत. कारण मागील काही वर्षात बंदुकीचा परवाना घेण्यासाठी अनेकांनी पोलिसांकडे अर्ज केले आहेत. स्वतःच्या सुरक्षिततेचे कारण देत अनेकांनी पिस्तूल परवान्यासाठी अर्ज केला आहे. दुसरीकडे पोलीस आयुक्त अमितेश कुमार यांनी पदभार स्वीकारल्यानंतर पिस्तूल परवाना देण्यासाठी कडक धोरणाची अंमलबजावणी सुरू केली. एकदा तर पुढे पोलिसांनी अवघ्या १९ परवाने दिले आहेत. याउलट अनेक पिस्तूल प्रमाणे रद्द करण्यात आले आहेत.
अमितेश कुमार यांनी आयुक्तपदाचा पदभार स्वीकारल्यानंतर य१ जानेवारी २०२४ पासून ३ जून २०२५ पर्यंतच्या कालावधीत ५७२ अर्जांपैकी फक्त २८ अर्जांना परवानगी दिली. तब्बल ४०४ अर्ज नाकारले. त्यात गुन्हेगारी पार्श्वभूमी असलेल्या ४३ जणांना दिलेले परवाने रद्द केले, तर नूतनीकरण न केल्यामुळे ९७ परवाने रद्द करण्यात आले. एकूण १४० परवाने रद्द/रद्दबातल केले आहेत. दरम्यान, अनेक अर्जदारांनी ‘स्वसंरक्षणासाठी परवाना हवा’ असे कारण दिले होते. मात्र, पोलिसांनी विनाकारण किंवा किरकोळ कारणांसाठी पिस्तुल परवाना देण्यास नकार दिला.
नवीन पोलीस आयुक्तांनी नाकारलेले परवाने
परवाण्यासाठी दाखल अर्ज नाकारले—४०४
दिलेले परवाने रद्द—४३ (गुन्हे नोंद असल्याने)
परवाना नुतनीकरण न केल्याने--- ९७
नवीन दिलेले परवाने- १९ (१०- वारसा हक्का व ९ स्पोर्ट्समधून मंजूर)