ठाकरे कुटुंबाची सून, मंत्री भरणेंचे चिरंजीव; जिल्हा परिषद निवडणुकीत नेत्यांची मुले रिंगणात!

पुणे जिल्ह्याचे राजकारण पुन्हा तापू लागले आहे. पुणे जिल्हा परिषदेसह जिल्ह्यातील पंचायत समित्यांची निवडणूक होत आहे. जिल्हा परिषदेच्या निवडणुकीत राज्यकारण्यांच्याच वारसादारांची चर्चा सुरू आहे. 

- किरण शिंदे, पुणे पुणे जिल्ह्यात सध्या  जिल्हा परिषद आणि पंचायत समिती निवडणुकांचे वारे वाहत आहेत. यानिमित्ताने राज्याच्या राजकारणात पुन्हा एकदा घराणेशाहीची चर्चा रंगली आहे. पुणे जिल्ह्यातील अनेक मातब्बर नेत्यांची दुसरी पिढी निवडणुकीच्या रिंगणात उतरल्याने मतदारांचा कल कोणाकडे झुकतो, याकडे सर्वांचे लक्ष असणार आहे. यंदाच्या जिल्हा परिषद निवडणुकीत राज्यातील प्रस्थापित राजकीय घराण्यांतील वारसदारांची मोठ्या प्रमाणात एन्ट्री होताना दिसत आहे. त्यामुळे ही निवडणूक केवळ स्थानिक प्रश्नांपुरती मर्यादित न राहता, दुसऱ्या पिढीची राजकीय कसोटी म्हणून पाहिली जात आहे.

राज्याचे कृषीमंत्री दत्तात्रय भरणे यांनी पहिल्यांदाच आपले चिरंजीव श्रीराज भरणे यांना राजकारणात उतरवले आहे. इंदापूर तालुक्यातील बोरी पंचायत समितीच्या निवडणुकीतून श्रीराज भरणे आपले राजकीय नशीब आजमावणार आहेत. भरणे कुटुंबीयांची इंदापूर तालुक्यात मजबूत पकड असून, मतदार घराणेशाहीला संधी देतात की नव्या चेहऱ्यांकडे पाहतात, हे पाहणे औत्सुक्याचे ठरणार आहे.

अंकिता पाटील-ठाकरे दुसऱ्यांदा रिंगणात

दुसरीकडे, माजी मंत्री हर्षवर्धन पाटील यांच्या कन्या अंकिता पाटील-ठाकरे या सलग दुसऱ्यांदा निवडणूक रिंगणात उतरल्या आहेत. त्यांनी जिल्हा परिषदेच्या बावडा गटातून उमेदवारी अर्ज दाखल केला आहे. मागील निवडणुकीचा अनुभव आणि ठाकरे कुटुंबाशी असलेले नाते, हे घटक त्यांच्या प्रचारात महत्त्वाची भूमिका बजावताना दिसत आहेत.

शिरूर तालुक्यातही घराणेशाहीचा प्रभाव स्पष्टपणे जाणवत आहे. राष्ट्रवादी काँग्रेसचे (अजित पवार गट) माजी आमदार पोपटराव गावडे यांचे चिरंजीव आणि बाजार समितीचे माजी संचालक राजेंद्र गावडे यांनी भाजपामध्ये प्रवेश करून जिल्हा परिषदेच्या टाकळी हाजी गटातून उमेदवारी अर्ज दाखल केला आहे. पक्षांतर करून निवडणूक लढवण्याचा त्यांचा निर्णयही राजकीय वर्तुळात चर्चेचा विषय ठरत आहे. त्यामुळे या निवडणुकीत अनेक प्रस्थापित कुटुंबांची प्रतिष्ठा पणाला लागली आहे.

एकीकडे अनुभव, ओळख आणि राजकीय वारसा; तर दुसरीकडे बदलाची अपेक्षा आणि नव्या नेतृत्वाची मागणी या दोन्हीमध्ये मतदार नेमका कोणता निर्णय घेतो, हे आगामी निकालातून स्पष्ट होणार आहे. जिल्हा परिषद निवडणूक यंदा घराणेशाहीला मतदार थारा देतात की नाकारतात, याचा कौल ठरणार असल्याचे चित्र सध्या दिसत आहे.